“Məncə, komandada dəyişiklik etməyə ehtiyac yoxdu. “Qarabağ” bəlli heyətiylə öz oyununu oynamalıdı. Sadəcə, bəzi məqamlarda daha diqqətli olmaq vacibdi. İlk oyunda xüsusilə müdafiə xəttində səhvlərə yol verildi. “Ludoqorets” hər iki qolu cinah asmaları sayəsində vurdu. “Qarabağ” cərimə meydançası daxilində və standart vəziyyətlərdə ehtiyatı əldən verməməlidi. Çünki rəqib belə epizodlardan yararlanmağı bacarır. Komandamız rəqibi bacardığı qədər önə çəkib ani hücumlarla qol vurmalıdı. “Ludoqorets”in müdafiə xəttində bacarıqlı futbolçuların sayı çoxdu. Bu üzdən arxada boşluqlar yaradılmalıdı. Məncə, rəqib hücumameyilli futbol oynamayacaq, daha çox müdafiə olunmağa üstünlük verəcək. “Qarabağ” onların əks-hücumlarında çox diqqətli olmalıdı, kiçik follarla qarşılarını almalıdı. Bura premyer-liqa deyil, avrokuboklardı. Komanda çempionatda çoxlu qol vəziyyəti yaradırsa, iki-üçündən istifadə edir. Avropa turnirlərində isə belə fürsətlərin sayı az olur. Belədə hər qol imkanı qızıl dəyərindədi. “Qarabağ” Bakıdakı oyunda “Ludoqorets”dən üstün oynadı. Daha çox təhlükəli hücumlar etdi. Amma son nöqtəni qoymaqda çətinlik çəkdi. Komanda məhz bu məqamlarda daha yaxşı oynasa, mərhələni adlayacaq”.