“Qarabağ”ın çoxtərəfli oyun sistemi yoxdu, bir üslubda oynayır. Həmişə 4-1-4-1 oynayırlar. Bəzən görürük ki, rəqibin yarımmüdafiə xəttində çoxluq varsa, bir dayaq yarımmüdafiəçini ikiyə çevirirlər. Ehtiyac olanda 4-3-3 sisteminə keçirlər. Mənə elə gəlir ki, çox da böyük dəyişiklik edəsi deyillər. Həm də dəyişiklik etməyin mənası yoxdu. Düşünürəm ki, Braqadakı oyun üslubunu davam etdirəcəklər. Çünki “Qarabağ”da yaxşı alınmışdı, komanda istədiyinə nail ola bilmişdi. Məncə, Braqadakı oyun üslubunu Bakıda dəyişmək yaxşı olmaz. “Braqa” mərhələni keçmək istəyirsə, ilk yarıda daha böyük qüvvə ilə hücuma keçmək məcburiyyətindədi. Belədə rəqibin müdafiə xəttinin arxasında boşluqlar yaranacaq. “Braqa” müdafiədə çoxlu səhvə yol verir. Ağdamlılar da bu şansları əldən verən deyil. “Qarabağ” müdafiə sistemli oyun göstərərsə, rəqib rahat şəkildə qabağa gələcək, tələsmədən istədiyi zaman hücum təşkil edə biləcəklər. Bu baxımdan, məncə, “Qarabağ” geriyə oturası deyil, meydanın rəqibə aid hissəsində pressinqi davam etdirməyə çalışacaq. Nə qədər rəqibi təzyiq altında saxlaya bilsə, “Qarabağ” üçün bir o qədər yaxşıdı. Qapımızı toxunulmaz saxlayacağıq, həm də “Braqa”nı səhvə məcbur edəcəyik. Belə düşünürəm ki, bu istiqamətdə gedəcək oyun. Bu oyun “köhlən atlar”ın böyükhesablı qələbəsiylə başa çata, amma “Qarabağ” bir-iki qol da vura bilər”.

“Qarabağ”ın bütün oyunlarına nəzər salsaq, görərik ki, öz oyun üslubuna malikdi. Nəticədən asılı olmayaraq, öz oyun tərzi var. Hesab edirəm ki, Qurban Qurbanov bunu dərk edir və başa düşür. “Qarabağ”ın ən böyük üstünlüyü odu ki, inamlı və layiqli oyunuyla yaxşı nəticələr əldə edib yolunu davam etdirəcək. Hesab edirəm ki, biz fərqli “Qarabağ” görməyəcəyik. “Köhlən atlar” ilk oyunda göstərdikləri performansı bu qarşılaşmada da ortaya qoyacaq. Ağdamlılar heç nədən çəkinməməli və inamlı oyun göstərməlidi. “Qarabağ”ın ən böyuk üstünlüyü komanda ruhunun olmasıdı. Bunu da hec kim onlardan ala bilməz”.