Bəli, bu gün o gündü! Futbol ictimaiyyətinin bir həftədi səbirsizliklə gözlədiyi matça saatlar qaldı. "Qarabağ" bu axşam Çempionlar Liqasının pley-offuna vəsiqə qazanmaq məqsədilə meydana çıxır.

"Football-plus.az" xəbər verir ki, matçı "CBC Sport" canlı yayınlayacaq.

Çempionlar Liqası
3-cü təsnifat mərhələsi, cavab oyunu
Ludoqorets (Bolqarıstan) - Qarabağ 2:7
Kuadvo Dua, 13; 21-p - Olavio Juninyo, 7. Yassin Benzya, 45+1-p; 118. Patrik Andrade, 45+5; 112. Toral Bayramov, 93. Redon Cica, 111.
Hakimlər: SİMONE SOZZA, Corcio Peretti, Davide İmperiale, Matteo Marketti (hamısı İtaliya).
13 avqust. Razqrad. "Ludoqorets Arena". Saat 22.00.
İlk oyun - 2:1.

"Qarabağ" ilk oyunda məğlub olmaqla nəinki "Tofiq Bəhramov"un tribunalarına toplaşan 30 minə yaxın azarkeşi, demək olar ki, futbol ictimaiyyətinin bütün nümayəndələrini xəyal qırıqlığına uğratdı. Düzdü, "Ludoqorets" Ağdam təmsilçisi üçün "asan yem" deyil. Lakin "köhlən atlar" avrokubokların ötən mövsümündə qazandığı uğurlarla gözləntiləri xeyli yüksəltmişdi. Heyətdə ciddi dəyişikliklərin olmaması isə həmin ümidlər üçün etibarlı zəmin idi. Hər halda, "olacağa çarə yoxdu" deyib, irəli addımlamalıyıq.

Qurban Qurbanovun komandası Razqradda çox ciddi sınaq qarşısındadı. O başqa məsələ ki, mümkün məğlubiyyət "Qarabağ"ı Avropa Liqasının pley-offuna aparacaq. İndi prioritet bu yox, baş məşqçinin də dediyi kimi, Çempionlar Liqasının qrup mərhələsidi. Əlbəttə, hədəfi "12"dən vurmaq üçün yeganə çıxış yolu qələbədi. Rəqiblərin durumuna nəzər salaq. "Qarabağ"dan Musa Qurbanlı, Amin Ramazanov və Şahruddin Məhəmmədəliyevin zədəli olduğunu bilirik. Düzü, sadalanan adların matçla bağlılıqları, demək olar ki, yoxdu. Əsas Fabian Buntiçin zədədən qorunmasıdı ki, əks halda "çərçivə"də Sadiq Məmmədzadəni görə bilərik. "Köhlən atlar"ın cəzalısı yoxdu. Ümumiyyətlə, “Qarabağ”ın qələbə qazanmasına azarkeş təzyiqindən başqa maneə görünmür. Ona görə ki, matç üçün bütün biletlər satılıb! Belədə komandanın uzun illər ərzində beynəlxalq arenada topladığı təcrübə köməyə gəlməlidi.
"Ludoqorets"də də dəyişikliklər var. Razqrad təmsilçisinin əsas oyunçularından Bernard Tekpetey əməliyyat olunubsa, ilk oyunda "qırmızı" alan Kayo Vidal cəzalıdı. Noah Sonko isə icarəyə verilib. Əlbəttə, Georgi Dermenciyevin yetərincə zəngin heyəti var və boşluqları doldurmağın yolunu tapacaq. Odu ki, "köhlən atlar" lazım olan qolları vurmalı, rəqibə aman verməməlidi. Dermenciyev demişkən, ağıllı oynamalıdı!

İndi seçim "Qarabağ"ındı. Avrokuboklardakı növbəti rəqib Zaqreb "Dinamo"su olacaq, yoxsa “Petrokub” (Moldova) – "Nyu Seynts" (Uels) cütünün qalibi?

KƏNAN BAHADIR