Bu gün avrokuboklardakı “ağır artilleriya” növbəti dəfə meydana çıxır.

Bəli-bəli, “Qarabağ” Çempionlar Liqasının 3-cü təsnifat mərhələsində ilk oyununu keçirir. Rəqib isə heç də zəif deyil. Söhbət Bolqarıstan futbolunun son 13 ilinin hegemonu “Ludoqorets”dən gedir. Bu dəfə “Qarabağ”ı aşkar favorit adlandırmaq mümkünsüzdü!

Çempionlar Liqası
3-cü təsnifat mərhələsi, ilk oyun
Qarabağ – Ludoqorets (Bolqarıstan) 1:2
Olavio Juninyo, 65 - Diniş Almeyda, 56. Kayo Vidal, 87.
Hakimlər: URS ŞNAYDER, Marko Sürxer, Benyamin Sürxer, Sven Volfensberger (hamısı İsveçrə).
6 avqust. Bakı. Tofiq Bəhramov adına Respublika stadionu. Saat 20.00.

Təbii ki, “Qarabağ” Çempionlar Liqasının cari mövsümündə qrupa düşmək niyyətindədi. Bunun üçün əvvəlcə “Ludoqorets”i, ardından pley-offdakı rəqibi – Zaqreb “Dinamo”sunu sıradan çıxarmaq lazımdı. İlk vəzifə məhz bu oyunda mümkün qədər rahat qələbə qazanıb cavab görüşündə daha iddialı olmaqdı. “Qarabağ”ın oyuna yetərincə ciddi hazırlaşdığı bəllidi. Hətta Qurban Qurbanov Elçin Rəhmanova güvənməyib, rəqibin oyununu özü izləməyi lazım bilib. Əlbəttə, azarkeşlər haqlı olaraq “köhlən atlar”a güvənir, onlardan qələbə istəyir. Lakin “Ludoroqets”i də kiçildə bilmərik. Razqrad klubu ardıcıl 9 il avrokubokların qrupuna düşüb. Ölkə çempionatında da rəqib tanımayan komanda, heç şübhəsiz, meydana qələbə üçün çıxacaq. Belədə “Qarabağ”ı dəstəkləmək və lazım olan nəticəni təmin etməsinə təkan vermək vacibdi. Klubun mətbuat xidmətinin rəhbəri Anar Hacıyevin qəzetimizə verdiyi məlumata görə, artıq 23 min bilet satılıb. Heyətə gəlincə, Elvin Cəfərquliyev artıq cəzalılar siyahısında deyil. Deməli, Qurban bəy onun xidmətindən yararlana bilər. Musa Qurbanlının da zədəli olduğunu vurğulayaq.

“Ludoqorets” dünən səhər saatlarında Bakıya gəlib. Səfərdən əvvəl ölkə çempionatında meydana çıxan “qartallar” “Arda”nı darmadağın edib – 5:1. Klub saytının məlumatına görə, baş məşqçi Georgi Dermenciyev bu matçda əsas heyətin 8 üzvünü meydana buraxmayıb.

Bolqarıstan çempionu ilə bağlı daha bir önəmli məqam var. “Ludoqorets” ilk iki mərhələnin hər birində evdə 2 top fərqi ilə qələbə qazanıb (Dinamo Bt – 3:1, Dinamo Mn – 2:0), ardından səfərdə 0:1 hesabıyla uduzub. “Qarabağ” mərhələ keçmək istəyirsə, evdə imkan daxilində çox qol vurmalıdı.

KƏNAN BAHADIR