Braziliya çempionatında 21-ci turun oyunlarından sonra liderlər qrupunda vəziyyət dəyişdi: A seriyasında ikihakimiyyətlilik pozuldu. Bunun səbəbi şərikli liderlərin fərqli nəticələr göstərməsidi.

Tura topların daha yaxşı fərqinə əsasən 1-ci pillədə başlayan “Flamenqo” üçün San Paulu səfəri uğursuz alındı. Eyniadlı komanda rio de janeyrolulardan oyun planında bir qədər üstün olmaqla istəyinə çatdı. 30 yaşlı argentinalı hücumçu Kalyerinin ikinci hissədə vurduğu qol meydan sahiblərinin qələbəsini təmin etdi. Başqa sözlə, “Flamenqo”nun 3 oyunluq qələbə seriyası qırıldı. Titenin komandası uğursuz nəticə ilə liderliyi əldən verdi. “Qırmızı-qaralar”ın ehtiyatda bir oyununun olduğunu da bildirək.

“Flamenqo”nun büdrəməsi “Botafoqo”nun işinə yaradı. Rio de Janeyronun digər komandası, gözlənildiyi kimi, “Atletiko Qoyaniense”dən maksimum xal aldı. Portuqaliyalı Artur Jorjenin komandası A seriyasının ən zəif iştirakçısını səfərdə məğlub etməkdə çətinlik çəkmədi. Doğrudu, meydan sahibləri ilk yarıda çempionluğa iddia edən rəqibinə bacardığı qədər müqavimət göstərməklə fasiləyə qənaətbəxş hesabla – 1:1 ilə yollana bildi. Lakin ikinci hissədə rəqiblər arasında səviyyə fərqi hesabda da əksini tapdı. “Botafoqo” 4:1 hesablı qələbə ilə vahid liderliyə yüksəldi.

20-ci turdan sonra şərikli liderlərdən 4 xal geri qalmaqla 3-cü yerdə olan “Palmeyras” heç cür özünə gələ bilmir. Çempion A seriyasının son 4 oyununda 3 dəfə məğlub olmaqla zirvə uğrunda yarışdan bir qədər aralı düşmüşdü. Abel Ferreyranın komandası az qala yenə uduzacaqdı. San paululular “İnternasyonal”la səfər matçında bir xalı çətinliklə qazandılar: sonradan meydana çıxan Roninin vurduğu cavab qolu qonaqları növbəti məğlubiyyətdən xilas etdi. Beləliklə, son 3 oyunda hesabına 1 xal yazan “Palmeyras” lider “Botafoqo”dan 6 xal geri düşdü.

“Fluminense”də vəziyyət getdikcə yaxşılaşır. Zarafat deyil, Libertadores Kubokunun son qalibi 17-ci turdan sonra cədvəlin sonuncu (!) pilləsində idi. İyunda baş məşqçi vəzifəsinə təyinat alan Manu Menezeş artıq yerli azarkeşlərdə əsaslı ümid oyada bilib. Problemləri tədricən aradan qaldırmağı bacaran 62 yaşlı mütəxəssisin komandası son 4 turda hesabına 12 xal yaza bilib. Maraqlıdı ki, “Flu” “Kuyaba”, “Palmeyras” və “Braqantino”dan sonra “Bayya”nı da minimal hesabla üstələdi. Uğurlu nəticələrin hesabına əvvəlcə sonuncu yerdən qurtulan rio de janeyrolular artıq 17-ci yerə yüksəlib. Onların hesabında təxirə salınan bir oyun olduğunu da bildirək.

21-ci tur
San Paulu – Flamenqo 1:0
Kalyeri, 61.
Atletiko Qoyaniense - Botafoqo RJ 1:4
Kempbell, 43-p. – Karlos Alberto, 21. İqor Jezus, 68. O.Romero, 81-p. Luis Enrike, 88-p.
İnternasyonal - Palmeyras 1:1
Bruno Enrike, 31 – Roni, 88.
Fluminense - Bayya 1:0
Kaua Elias, 45.
Vasku da Qama - Braqantino 2:2
Qabriel, 50. Adson, 60 – Con Con, 5. Elinyo, 89.
Vitoriya - Kuyaba 1:0
Vaqner Leonardo, 71.
Krisiuma - Atletiko Mineyro 2:1
İqor Meritano, 58. Anxel, 65 – Kadu, 90+6.
Korintians - Juventude 1:1
Pedro Enrike, 48 – Alan Ruşel, 4.
Atletiko Paranaense - Qremio 0:2
Qustavo Martins, 18. Monsalve, 21.
“Kruzeyro” – “Fortaleza” oyunu gec başa çatıb.

1. Botafoqo RJ 21 13 4 4 35-20 43
2. Flamenqo 20 12 4 4 34-20 40
3. Palmeyras 21 11 4 6 28-17 37
4. Fortaleza 19 10 6 3 24-18 36
5. Kruzeyro 19 11 2 6 28-20 35
6. San Paulu 21 10 5 6 29-21 35
7. Bayya 21 9 5 7 29-25 32
8. Atletiko Paranaense 19 8 4 7 22-20 28
9. Atletiko Mineyro 19 7 7 5 28-28 28
10. Braqantino 19 7 5 7 24-23 26
11. Vasku da Qama 20 7 3 10 22-31 24
12. Krisiuma 19 6 6 7 28-29 24
13. Juventude 19 5 7 7 21-25 22
14. Qremio 19 6 3 10 17-22 21
15. Vitoriya 21 6 3 12 23-32 21
16. İnternasyonal 16 5 6 5 14-14 21
17. Fluminense 20 5 5 10 16-24 20
18. Korintians 21 4 8 9 19-28 20
19. Kuyaba 19 4 5 10 19-25 17
20. Atletiko Qoyaniense 21 2 6 13 17-35 12
Bombardirlər: Pedro (Flamenqo) – 10, Lusero (Fortaleza) – 8, Halk (Atletiko Mineyro) - 7.