Braziliya çempionatında keçirilən 16 və 17-ci turlardan sonra lider dəyişdi. Bunun səbəbi “Flamenqo”nun yeganə oyunda məğlubiyyəti, “Palmeyras”ın iki oyunda 3, “Botafoqo”nun isə 6 xal toplaması ilə bağlı oldu. Nəticədə 15-ci turdan sonra lider olan “Flamenqo” yerini “Botafoqo”ya verdi. A seriyasında son iki turda müxtəlif səbəblərdən 4 oyunun oyunları təxirə salındığını da qeyd edək.

İki tur əvvəl uğurlu oyunlar seriyası ilə vahid lider olan “Flamenqo”nun evdə “Fortaleza” ilə keçirdiyi oyun bir qədər gözlənilməz nəticələndi. Titenin komandası son həftələr özü kimi yüksəlişdə olan rəqibinin ciddi müqaviməti ilə üzləşdi. Nəticədə 1:2 hesablı məğlubiyyət rio de janeyroluları liderlikdən etdi. Onların növbəti turda “İnternasyonal” ilə keçirməli olduqları səfər oyunu isə qeyri-müəyyən vaxta təxirə salındı.

15-ci turdan sonra hərəyə 30 xal toplamaqla 2-3-cü yerləri bölüşən “Botafoqo” ilə “Palmeyras” iki tur ərzində fərqli nəticələr göstərdilər. Ümumiyyətlə, son bir ay “Palmeyras” üçün çox uğurlu alınmışdı. Mövsümə zəif başlayan son çempion bu müddətdə baş tutan 7 turda hamıdan çox – 16 xal toplamaqla cədvəldə 3 pilləlik yüksəlişə nail olmuşdu: Abel Ferreyranın komandası 6-cı yerdən 3-ə çıxmaqla yanaşı, lider ilə xal fərqini birə endirmişdi. 16-cı turda evdə “Atletiko Qoyaniense”yə 3:1 hesabıyla qalib gələn san paululular uğurun davamını gətirə bilmədilər. Onların “Botafoqo” ilə dueli 17-ci turun mərkəzi oyunu sayılırdı. Meydan sahibi rolunda çıxış edən “Botafoqo” qələbə qazanmaqla vahid liderliyə nail olacaqdı. Belə də oldu: portuqaliyalı mütəxəssislərin duelindən Artur Jorje qalib çıxdı. Rio de Janeyroda keçirilən matçın nəticəsini bir qol müəyyən etdi. Tikinyo Soaresin 56-cı dəqiqədə vurduğu qol komandasını liderliyə yüksəltdi. “Palmeyras” isə yeni liderdən 3 xal geri qalmaqla 2-ci yerdədi.

“Fluminense”də vəziyyət əvvəlki kimi qalır. Zarafat deyil, Libertadores Kubokunun son qalibi əvvəlki 7 turda yalnız 1 xal qazanmaqla cədvəlin 16-cı pilləsindən “zirzəmi”sinə yuvarlanmışdı. Belə uğursuzluqdan sonra istefaya göndərilən Fernando Dinizin yerini tutan 62 yaşlı Manu Menezeş hələ ki komandanı uğursuzluq zolağından heç cür çıxara bilmir. Son iki turda yalnız bir dəfə meydana çıxan “Flu” səfərdə “Krisiuma”dan bir xal (1:1) almağı bacardı. Rio de janeyrolular əvvəlki kimi sonuncu yerdədilər.

16-cı tur
Flamenqo – Fortaleza 1:2
Pedro, 39-p. – Uesli, 11-öz qapısına. Lusero, 63.

Vitoriya - Botafoqo RJ 0:1
Savarino, 62.

Palmeyras - Atletiko Qoyaniense 3:1
X.Lopes, 6. Rafael Veyqa, 51. Aliks, 53-öz qapısına – Şeylon, 9.

Atletiko Mineyro - San Paulu 2:1
Varqas, 13. Paulinyo, 45+3 – Lukas Moura, 18.

Atletiko Paranaense - Bayya 1:3
Di Yorio, 61 – Everaldo, 9. Byel, 15. Lusiano Juba, 78.

Qremio - Kruzeyro 0:2
Ramiro, 12. Artur Qomes, 17.

Vasku da Qama - Korintians 2:0
Lukas Piton, 55. Sfortsa, 90+5.

Krisiuma - Fluminense 1:1
Mateuzinyo, 53 – Kaua Elias, 89.

“Braqantino” – “İnternasyonal” və “Kuyaba” – “Juventude” oyunları təxirə salınıb.

17-ci tur
Botafoqo RJ – Palmeyras 1:0
Tikinyo Soares, 56.

San Paulu – Qremio 1:0
Lukas Moura, 10.

Kruzeyro - Braqantino 2:1
Qabriel Veron, 8. Mateus Pereyra, 84 - Borbas, 90+5.

Bayya - Kuyaba 1:2
Jean Lukas, 49 – Pitta, 22; 51.

Juventude - Atletiko Mineyro 1:1
Jean Karlos, 43 – Alonso, 18.

Korintians – Krisiuma 2:1
A.Romero, 54. Kaka, 62 – Klaudinyo, 41.

Atletiko Qoyaniense - Vasku da Qama 0:1
David, 51.

Fortaleza – Vitoriya 3:1
Breno Lopes, 25. Poçettino, 39. Tinqa, 55 – Ze Uqo, 90.

“İnternasyonal” - “Flamenqo” və “Fluminense” – “Atletiko Paranaense” oyunları təxirə salınıb.

1. Botafoqo RJ 17 11 3 3 28-14 36
2. Palmeyras 17 10 3 4 25-13 33
3. Flamenqo 16 9 4 3 28-17 31
4. San Paulu 17 9 3 5 26-18 30
5. Bayya 17 9 3 5 27-21 30
6. Kruzeyro 16 9 2 5 23-18 29
7. Fortaleza 16 8 5 3 19-16 29
8. Atletiko Paranaense 16 7 4 5 20-16 25
9. Vasku da Qama 17 7 2 8 20-26 23
10. Braqantino 16 6 4 6 21-20 22
11. Atletiko Mineyro 16 5 7 4 23-25 22
12. Juventude 15 5 5 5 19-20 20
13. İnternasyonal 13 5 4 4 12-11 19
14. Krisiuma 15 4 5 6 22-24 17
15. Kuyaba 16 4 5 7 18-21 17
16. Vitoriya 17 4 3 10 19-28 15
17. Korintians 17 3 6 8 14-23 15
18. Qremio 15 3 2 10 10-20 11
19. Atletiko Qoyaniense 17 2 5 10 14-25 11
20. Fluminense 16 1 5 10 12-24 8

Bombardirlər: Pedro (Flamenqo) – 8, Lusero (Fortaleza) - 7.