Braziliyanın bir neçə ştatında baş verən təbii fəlakət ölkə çempionatına mənfi təsirini davam etdirir.

“Football-plus.az” xəbər verir ki, A seriyasının 6-cı turunda nəzərdə tutulan on oyundan üçü daşqın və sel səbəbindən qeyri-müəyyən müddətə təxirə salındı. Əvvəlki turda ikihakimiyyətlilik yaranmışdı. Belə vəziyyət son 7 matçdan sonra da dəyişmədi.

Turun mərkəzi oyunu San Pauluda keçirildi. Mövsümə zəif başlayan son çempion “Palmeyras” əvvəlki turda 3 oyunluq qələbəsiz seriyaya son qoymuşdu. İlk 4 oyunda 5 xal qazanan və yalnız bir qol vura bilən Abel Ferreyranın komandası autsayder “Kuyaba” üzərində qələbə (2:0) ilə 6-cı yerə yüksəlmişdi. “Yaşıllar”ın növbəti rəqibi ötən tur 1-ci yerə yüksələn “Atletiko Paranaense” idi. Bu komandaya martda təyinat alan Kukanın fəaliyyəti diqqəti cəlb edir. Kuritibalılar çempionla sınaqdan da uğurla çıxdılar. Ümumiyyətlə, “Arena Barueri”dəki matç hadisələr baxımından zəngin alındı. “Palmeyras” oyun planında üstün olsa da, bu, ev sahiblərinə bir xal belə qazandırmadı. Əslində hesabı məhz çempion aça bilərdi. Lakin Rafael Veyqa fasilə ərəfəsində penaltini boşa verdi. Bir neçə dəqiqə sonra qonaqlar Pablo ilə hesabda önə keçdilər. Meydan sahibləri ikinci hissənin əvvəlində topu ikinci dəfə öz qapılarında gördülər. Təhlükəni sovuşdurmaq istəyən müdafiəçi Qustavo Qomes atvoqola səbəbkar oldu. San paululuların hücumlarının daha da artması gözlənilən idi. Qonaq komandanın oyunçuları sərt və kobud oyunla hesabı qorumağa çalışırdılar. Bu səbəbdən 67-ci dəqiqədə Eskivel növbəti xəbərdarlığa görə komandasını meydanda on nəfərlə qoydu. Amma “Palmeyras” bundan heç cür yararlana bilmədi. Beləliklə, Ferreyranın komandası yeni mövsümdə 2-ci məğlubiyyətini alaraq 9-cu yerə düşdü. “Atletiko Paranaense” isə xalını 13-ə çatdırmaqla topların daha yaxşı fərqinə əsasən 1-ci yerdə qaldı.

Tura şərikli lider kimi başlayan “Bayya” da qalib gəldi. Rojerio Seninin çalışdırdığı komanda evdə “Braqantino”dan maksimum xalı bir qolla aldı. Qonaqlar oyun planında daha yaxşı təsir bağışlasalar da, salvadorlular yenə rəqibinə nisbətən daha effektli oyun sərgilədilər. Ardıcıl 3-cü qələbə “Bayya”nı 2-ci pillədə qalmasını təmin etdi.

Tura hərəyə 9 xalla 3-5-ci yerləri bölüşməklə başlayan komandalaran heç biri qələbə qazana bilmədi. Daha doğrusu, “Atletiko Mineyro”nun “Qremio” ilə ev oyunu məlum səbəbdən təxirə salındı. “Braqantino”nun “Bayya”ya uduzduğunu qeyd etdik. “Botafoqo” isə səfərdə “Fortaleza” ilə qollu “sülh”ə (1:1) razılaşdı. Rio de janeyrolular 10 xalla 4-cü yerə düşdülər.

Hazırda daha iki komandanın hesabında da 10 xal var. “San Paulu”nun yeni baş məşqçi ilə uğurlu çıxışı davam edir. Bu vəzifəyə apreldə təyinat alan Luis Subeldiyanın komandası evdə “Fluminense”ni 2:1 hesabıyla məğlub etdi. Son 4 oyunda 3-cü qələbə san paululuları 8-ci yerdən 5-ə çıxardı. “Kruzeyro” isə ardıcıl 2-ci qələbə ilə dördpilləlik sıçrama ilə 6-cı yerə yüksəldi.

Nəhayət, “Flamenqo” 3 oyunluq qələbəsizliyə son qoydu. Titenin çalışdırdığı komanda evdə “Korintians”ı 2:0 hesabı ilə məğlub etdi. Rio de janeyrolular bu qələbə ilə 7-ci pillədən 3-ə yüksəldilər. “Fla” yenə şərikli liderlərdən iki xal geri qalır.

6-cı tur
Palmeyras - Atletiko Paranaense 0:2
Pablo, 45+9. Q.Qomes, 59-öz qapısına.
Bayya - Braqantino 1:0
Tasiano, 37.
Fortaleza - Botafoqo RJ 1:1
Poçettino, 10 – Danilo Barboza, 41.
Flamenqo - Korintians 2:0
Pedro, 20. Lorran, 63.
San Paulu - Fluminense 2:1
Bobadilya, 32. Arboleda, 84 – İqor Vinisius, 28-öz qapısına.
Atletiko Qoyaniense – Kruzeyro 0:1
Mateus Pereyra, 81.
Vasku da Qama - Vitoriya 2:1
Maykon, 50. Veqetti, 56 – Yuri Kastilyo, 89.
“Krisiuma” – “Kuyaba”, “Atletiko Mineyro” - “Qremio” və “İnternasyonal” - “Juventude” oyunları təxirə salınıb.

1. Atletiko Paranaense 6 4 1 1 9-3 13
2. Bayya 6 4 1 1 9-6 13
3. Flamenqo 6 3 2 1 7-5 11
4. Botafoqo RJ 6 3 1 2 12-7 10
5. San Paulu 6 3 1 2 10-6 10
6. Kruzeyro 5 3 1 1 8-7 10
7. Atletiko Mineyro 5 2 3 0 9-3 9
8. Braqantino 6 2 3 1 7-6 9
9. Palmeyras 6 2 2 2 3-3 8
10. İnternasyonal 4 2 1 1 4-3 7
11. Fortaleza 5 1 4 0 5-4 7
12. Qremio 4 2 0 2 4-3 6
13. Vasku da Qama 6 2 0 4 6-11 6
14. Krisiuma 3 1 2 0 6-5 5
15. Juventude 4 1 2 1 5-7 5
16. Korintians 6 1 2 3 3-5 5
17. Fluminense 6 1 2 3 8-12 5
18. Vitoriya 5 0 1 4 5-11 1
19. Atletiko Qoyaniense 5 0 1 4 2-8 1
20. Kuyaba 4 0 0 4 0-10 0
Bombardirlər: Danilo Barboza (Botafoqo), Lusiano (San Paulu), Everaldo (Bayya), Varqas (Atletiko Mineyro), Veqetti (Vasku da Qama) - 3.