“Qarabağ” bu gün Avropa Liqasının qrup mərhələsinin oyununda “Molde” ilə qarşılaşacaq. Artıq səfər oyununun hakimləri müəyyənləşib. UEFA Moldedə keçiriləcək görüşü belçikalı referilərə etibar edib. Referi Erik Lambrextsə Co de Veyrdt və Kevin Monteni yardım göstərəcək. Natan Verboomen isə dördüncü hakim funksiyasını yerinə yetirəcək.

"Football-plus.az"ın ənənəvi hakim təqdimatına keçid alaq.

Erik Lambrexts… Ədalət təmsilçisi karyerasına ölkəsinin aşağı liqa çempionatlarında başlayıb. Burda 39 oyun idarə edən hakimin idarəçiliyi mütəxəssislər tərəfindən qənaətbəxş dəyərləndirilib. Tezliklə yüksək liqada da şans qazanan hakim UEFA-nın da diqqətindən yayınmayıb. Əvvəlcə Belçikanın əsas futbol çempionatında 180 görüşdə iştirak edən referinin statistikasına nəzər salaq. O, futbolçuları 770 sarı, 38 qırmızı vərəqəylə cəzalandırıb. Maraqlıdı ki, Erikə gənc yaşlarından beynəlxalq arenalarda ehtiyac duyulub. Referi indiyə qədər 17, 19 və 21 yaşadək futbolçuların Avropa çempionatının, Gənclər, Millətlər, həmçinin Çempionlar, Avropa və Konfrans Liqalarının oyunlarını idarə edib. Bu sırada “Qarabağ” da var. 2013-cü ildən beynəlxalq görüşlərdə iş başında olan 39 yaşlı belçikalı Ağdam klubunun ötən mövsüm Almaniyada "Frayburq"a 1:2 hesabıyla uduzduğu qarşılaşmada ədaləti qoruyub. 2021-ci ildə isə həm millimizin, həm də “Qarabağ”ın bir oyununda meydana çıxıb. Referi DÇ-2022-nin seçmə mərhələsində yığmamızın səfərdə Serbiyaya məğlubiyyətinə (1:3), həmçinin Qurban Qurbanovun baş məşqçisi olduğu komandanın Konfrans Liqasının qrup mərhələsinin 1-ci turunda Bakıda “Bazel”lə qolsuz heç-heçəsinə şahidlik edib. Bununla yanaşı, o, 2018-ci ildə U-19 millimizin iki matçında iş başında olub. Komanda AÇ-2019-un seçmə mərhələsində Lixtenşteynə qalib gəlib (3:0), İsrailə isə uduzub (1:4).

Bəlli olur ki, “Qarabağ” Erikin idarə etdiyi matçlarda qələbəyə həsrət qalıb. İndi tilsimin qırılacağına ümid etməkdən başqa çarə yoxdu. Ümumiyyətlə, adı çəkilən hakim karyerası ərzində 351 qarşılaşmada iş başında olub, 1474 sarı, 97 qırmızı vərəqəylə yadda qalıb.

KƏNAN BAHADIR