Bu gün "Qarabağ" Avropa Liqasının pley-off mərhələsi çərçivəsində Portuqaliyada yerli "Braqa" ilə qarşılaşacaq.

Artıq oyunun hakim təyinatları bəllidi. Belə ki, matçı Danimarkadan olan briqada idarə edəcək. Baş hakim Morten Kroqa Vollenberq Rasmussen və Steffen Bramsen yardımçı olacaq. Dördüncü hakim funksiyasını Mikkel Redder yerinə yetirəcək. VAR-da niderlandlı Rob Dieperink və köməkçisi danimarkalı Yonas Hansen əyləşəcək.

Əlbəttə, görüşün taleyinə təsir göstərəcək məqamlardan biri də necə idarə olunacağıdı. Deyəsən, Morten Kroq adı qulağa tanış gəlir axı… Görəsən, UEFA "Qarabağ"ı əmin əllərə tapşırıb? Bu suala cavab tapmaq üçün qəzetimizin ənənəvi hakim təqdimatına keçid alaq.

Morten Kroq... Danimarkanın 35 yaşlı tanınmış hakimi öncə ölkə daxilində, sonra da beynəlxalq meydanlarda özündən söz etdirməyi bacarıb. Vətənində aşağı liqa matçlarında təcrübə toplayan ədalət təmsilçisi karyerasına superliqada davam edib. Maraqlıdı ki, Mortenin Danimarkadakı fəaliyyəti say baxımından zəngin deyil. Yəni “fit sahibi” qısa zamanda UEFA-nın diqqətini çəkə bilib. Qeyd edək ki, o, superliqada 82 matçda meydana çıxıb və 352 sarı, 14 qırmızı vərəqə göstərib. Beynəlxalq oyunlara gəlincə, siyahı genişdi. Referi Çempionlar, Avropa, Konfrans, Gənclər və Millətlər Liqasında, həmçinin 17, 19 və 21 yaşadək futbolçuların Avropa çempionatı oyunlarında ədaləti qoruyub.

İndi isə mövzunun daha vacib hissəsinə keçid alaq. Danimarkalı karyerası ərzində üçüncü dəfə “Qarabağ”ın matçında təyinat alıb. Belə ki, Morten daha əvvəl bir dəfə baş hakim, bir dəfə isə əlavə köməkçi hakim qismində “köhlən atlar”ın qarşılaşmasında ədalət təmsilçiləri arasında olub. O, Avropa Liqasının 2018/19 mövsümünün qrup mərhələsinin “Arsenal” – “Qarabağ” oyununda əlavə köməkçi rolunda çıxış edib. Londonda keçirilən matçda meydan sahibləri qələbə qazanıb – 1:0. Kroqun bizimkilərlə ikinci görüşü isə Konfrans Liqasımım 2021/22 mövsümünə təsadüf edib. Baş hakim qismində Bakıya gələn danimarkalı “Qarabağ” – “Omoniya” (Cənubi Kipr) qarşılaşmasında (2:2) Musa Qurbanlı, Toral Bayramov və Kadi Borgesə sarı vərəqə göstərib.

Ümumiyyətlə, referi ölkədaxili yarışlar da daxil olmaqla, karyerası ərzində 273 matç idarə edib. O, bu oyunlarda 998 sarı, 37 qırmızı vərəqə göstərib. Ümid edək ki, cəzalarla bağlı statistika “Qarabağ”ın əleyhinə artmayacaq. Həmçinin üçüncü təyinat bizimkilərin ilk qələbəsiylə nəticələnəcək. Hə, Kroq, atalar üçdən deyib…

KƏNAN BAHADIR