''Beşiktaş'' superliqanın 32-ci turunda öz meydanında qəbul etdiyi ''Samsunspor''u məğlub edə bilməsə də, Semih Kılıçsoy diqqətçəkən bir göstəriciyə nail oldu.

Mövsümün kəşfi sayılan 18 yaşlı forvard 18-ci dəqiqədə vurduğu qolla komandasını hesabda önə keçirdi. Bu, Semihin cari mövsüm superliqada vurduğu 10-cu qol oldu. Bununla da Kılıçsoy 18 yaş 242 günlüyündə ''Beşiktaş'' tarixində bir mövsümdə çempionat çərçivəsində 10 qol həddinə çatan ən gənc 2-ci futbolçu oldu. O, yalnız Oktay Dərəlioğludan geri qalır. Vaxtilə ölkəmizdə də top qovmuş Dərəlioğlu 1993/94-də 10 qol həddinə 18 yaş 127 günlüyündə çatmışdı.

Avropa klublarının diqqət mərkəzində olan Semih bu mövsüm 29 rəsmi oyunda 1711 dəqiqə meydanda olub və 11 qol, 2 məhsuldar ötürməlik fayda verib. ''Beşiktaş'' rəhbərliyi bu günlərdə ''Ayntraxt''ın Semihə görə irəli sürdüyü 9 milyon avroluq təklifi geri çevirmişdi.

ƏLİ