Nəhayət, çox çək-çevirdən sonra Robin Le Norman ilə bağlı məsələyə rəsmən aydınlıq gəlib.

“Football-plus.az” xəbər verir ki, “Atletiko” “Real Sosyedad”ın mərkəz müdafiəçisini transfer edib.
Madrid klubunun saytının məlumatına görə, Le Normana görə 34,5 milyon avro ödənilib. Ancaq müqavilənin digər detalları haqda məlumat verilmir. İspaniya yığması ilə AÇ-2024-ün qalibi olan 27 yaşlı futbolçu tətildən qayıtdıqdan sonra yeni klubu ilə rəsmi müqavilə imzalayacaq.

Le Norman “Brest”in yetirməsi olsa da, Fransa klubunun əsas komandasında 2016-cı ildə yalnız bir rəsmi oyun keçirib. 2016-19-cu illərdə “Real Sosyedad”ın əvəzedici heyətində çıxış edən futbolçu son 5 ili əsas komandada keçirib. İspaniya klubunda keçirdiyi 221 oyunda 6 qolun və 6 məhsuldar ötürmənin müəllifi olub. Ötən mövsüm bütün turnirlərdə 43 oyuna çıxan və 2 qol vuran Robinin İspaniya yığmasında 17 oyuna bir qol vurduğunu da xatırladaq.

Le Normanın paytaxt klubuna gəlişi Antuan Qrizmannın gedişi ilə müşayiət oluna bilər. DÇ-2018-in qalibinin Madriddə qalmaq perspektivi hələ də dumanlı görünür. Təcrübəli futbolçunun ABŞ-yə yollanmaq şansı var. Fransalı hücumçunu “Los Anceles” transfer etmək istəyir. Son xəbərdə Madrid klubunun Qrizmannın gələcəyi ilə bağlı qərar vermədiyi, ancaq futbolçunun MLS-də oynamaq istədiyi qeyd edilib.

Antuanın “Atletiko” ilə müqaviləsinin müddəti 2025-ci ilin yayında başa çatacaq. Yeri gəlmişkən, “Los Anceles” bu günlərdə onun həmyerlisi Olivye Jirunu sıralarına cəlb edib.