Gözlənildiyi kimi, Qabriel Veyqa “Selta”nı tərk edib. Onun karyerasını Səudiyyə Ərəbistanında davam etdirəcəyi də zaman məsələsi idi.

"Football-plus.az" xəbər verir ki, artıq ispaniyalı futbolçu “Əl-Əhli”nin sıralarındadı. 21 yaşlı yarımmüdafiəçinin bu kluba konkret hansı qiymətə satılmasına rəsmən aydınlıq gətirilməyib. Bəzi mənbələr onun keçidinin bir neçə gün əvvəl 30 milyon avroya reallaşacağıını xəbər vermişdi. İnsayder Fabritsio Romano Qabrielin yeni klubu ilə müqaviləsində satış qiymətinin 40 milyon avro müəyyənləşdirildiyini bildirib.

Veyqa “Selta”nın yetirməsidi. İspaniya klubunun əsas komandasında 2021-ci ildən çıxış edirdi. Mərkəz yarımmüdafiəçisi son mövsümdə bütün turnirlərdə meydana çıxdığı 40 oyunda 11 qol vurub və 4 məhsuldar ötürmə verib.

Yeri gəlmişkən, “Selta” heyətinə yeni oyunçu cəlb edib. Anastasios Duvikasa görə “Utrext”ə 12 milyon avro ödənilib. Yunan futbolçu ilə 5 illik müqavilə bağlanılıb. Anastasios Niderland klubunda keçirdiyi 77 oyunda 32 qolun və 7 məhsuldar ötürmənin müəllifi olub. Onun Yunanıstan yığmasında keçirdiyi 15 oyunda 1 qol vurduğunu da bildirək.