“Atletiko” qış “transfer pəncərəsi” dövründə kifayət qədər fəallıq göstərib. İspaniya klubu bir neçə oyunçunu sıralarına cəlb edib.

Paytaxt klubu “Valensiya”dan Qabriel Paulistanı heyətinə qatıb. 33 yaşlı mərkəz müdafiəçisi ilə müddəti mövsümün sonuna qədər nəzərdə tutulan müqavilə imzalanıb. Qeyd edək ki, braziliyalı futbolçu ölkəsində “Vitoriya”, Avropada isə “Vilyarreal” və “Arsenal”da çıxış edib.
“Atletiko” heyətinə yeni oyunçu cəlb edib.

İspaniya klubunun rəsmi saytının yaydığı xəbərə görə, Rumıniya millisinin qapıçısı Horatsiu Moldovanla 3,5 illik müqavilə imzalanıb. Buxarest “Rapid”indən Madrid klubuna keçən 26 yaşlı əlcək sahibi Rumıniya klubunun heyətində 113 oyun keçirib və 125 qol buraxıb. O, qapısını 42 dəfə toxunulmaz saxlayıb.

“Atletiko” “Antverp”dən isə Artur Vermereni transfer edib. Belçikalı yarımmüdafiəçisi ilə müddəti 2030-cu ilin iyununa qədər razılaşdırılan müqavilə imzalanıb. Bu mövsüm 18 yaşlı futbolçu “Antverp” ilə 32 oyuna çıxıb, 2 qol vurub və 6 məhsuldar ötürmə verib. “Transfermarkt” onun transfer dəyərini 30 milyon avro qiymətləndirir.

Paytaxt klubunu tərk edənlər də var. Müdafiəçi Xavi Qalan icarəyə verilib. O, mövsümün sonuna kimi bu status ilə “Real Sosyedad”a çıxış edəcək. Qeyd edək ki, 29 yaşlı futbolçu bu mövsüm “Atletiko”da bütün turnirlərdə 9 matçda oynayıb. Xavi daha əvvəl “Kordoba”, “Ueska” və “Selta”nın formasını geyib.

Qapıçı İvo Qrbiç isə “Şeffild Yunayted”ə keçib. İngiltərə klubunun saytının məlumatına görə, 28 yaşlı oyunçu ilə uzunmüddətli müqavilə imzalanıb. Qrbiç Madrid klubunda 2020-ci ildən çıxış edirdi. Xorvatiyalı futbolçu “Atletiko”da 14 oyun keçirib, 14 qol buraxıb və 4 matçda qapısını toxunulmaz saxlayıb.