Bu transfer dönəmində heyətini Linkoln Enrike və Armindo Bruma ilə gücləndirən ''Fənərbaxça'' ilk yerli transferini həyata keçirməyə yaxındı.

''Konyaspor''lu Abdülkadir Bardakçını əldən verən İstanbul nəhəngi əvəzində Əmrə Moru almaq üzrədi. Bilindiyi kimi istedadı çox gənc yaşda kəşf olunan və Avropanın bir çox klublarında forma geyən Əmrə dəbdəbəli həyata meyl göstərməsi və peşəkarlıqdan uzaq həyat sürməsi üzündən karyerasını məhv etmək üzrə idi. Amma 25 yaşlı vinger ötən mövsüm ''Fatih Karagümrük''ün heyətində necə deyərlər ağlını başına toplayaraq nəhayət ondan gözlənilən oyunu sərgiləməyə başladı. Bu üzdən mövsüm başa çatan kimi bir çox klub ona maraq göstərməyə başladı.

"Fatih Karagümrük''ün prezidenti Süleyman Hurma hər vəchlə Əmrəni heyətdə saxlamağa çalışacaqlarını demişdi. Amma Türkiyə mətbuatının yazdığına inansaq, ''Fənər'' artıq ''Fatih Karagümrük''lə anlaşma əldə edib. Əmrə özü də ''sarı-lacivərdlilər''də oynamağa həvəslidi.

Keçidin detallarına gəlincə, ''Fənər'' qarşı tərəfə 2 milyon avro və bonuslar ödəyəcək. Futbolçu ilə ''2+1'' illik müqavilə imzalanacaq. Onun illik məvacibi 1 milyon 250 min avroya bərabər olacaq. Klublar arasında son detalların həll olunmasının ardından rəsmi müqavilənin imzalanacağı gözlənilir. Əmrə 2021/22-də ''Fatih Karagümrük''ün heyətində 29 rəsmi oyunda 6 qol, 4 məhsuldar ötürməlik performans sərgiləyərək karyerasının ən uğurlu mövsümünü keçirmişdi. Onu da bildirək ki, bu futbolçu həm də ''Qalatasaray''ın sabiq üzvüdü. O, 2020/21-in ilk dövrəsini icarə əsasında ''Cim-Bom''da keçirmişdi.