“Fənərbaxça” yeni transferlər üçün imza mərasimi keçirdi - ƏTRAFLI
“Fənərbaxça” ilə bağlı transfer xəbərləri var.
"Football-plus.az" xəbər verir ki, İstanbul nəhəngi hələ çərşənbə günü yeni transferini açıqladı. Söhbət Oğuz Aydından gedir. “Alanyaspor”dan transfer edilən 23 yaşlı futbolçu ilə dördillik müqavilə imzalandı. Özü də bu transfer “sarı-lacivərdlilər”ə 6 milyon avroya başa gəlib!
Niderlandda doğulan və “Alkmaar”ın akademiyasında futbola başlayan Aydın daha sonra Türkiyəyə gələrək “Bucaspor”un “altyapı”snda çıxış etməyə başlayıb. Maraqlıdı ki, “Alanyaspor” bu futbolçunu 2021-in yayında İzmir klubundan cəmi 218 min avroya transfer etmişdi. Oğuz Aydın geridə qoyduğumuz mövsüm “Alanyaspor”un heyətində 38 rəsmi oyunda 13 qol, 8 məhsuldar ötürməlik performans sərgiləyib. Yeri gəlmişkən, bu futbolçu bir müddət öncə “Qalatasaray”ın da ciddi maraq dairəsində idi. Amma “Cim-Bom” son anda ondan vaz keçmək qərarına gəlmişdi. Təsadüfi deyil ki, Oğuz Aydının transferinə həsr olunmuş videoçarxda “Fənərbaxça” “Qalatasaray”a ilişməyi də yaddan çıxarmayıb.
Bundan başqa, “Fənər” Allan Sent-Maksimen ilə Cenk Tosunun da transferini rəsmən açıqlayıb. Səudiyyə Ərəbistanı təmsilçisi “Əl-Əhli”dən birilliyə icarəyə götürülən 27 yaşlı vingerin keçidinin detalları bəlli olub. “Fənər” icarəhaqqı kimi “Əl-Əhli”yə 8 milyon avro ödəyəcək. İcarə üçün astronomik məbləğ kimi görünsə də, istanbullular bu futbolçuya maaş ödəməyəcəklər. Sent-Maksimenin maaşını “Əl-Əhli” ödəməkdə davam edəcək. “Beşiktaş”dan ayrılaraq azad agent statusunda komandaya qoşulan Cenk Tosunla ikillik müqavilə imzalanıb. Onun maaşı rəsmi şəkildə açıqlanmasa da, iddiaya görə Cenkin iki il ərzində qazancı maksimum 2,5 milyon avroya bərabər olacaq.
Bu arada “Fənərbaxça” yeni transferlər üçün toplu şəkildə imza mərasimi keçirib. “Ülkər” stadionunda təşkil onunan mərasimdə Ləvənt Mərcan, Çağlar Söyüncü, Oğuz Aydın, Allan Sent-Maksimen kimi yeni transferlərlə yanaşı, bu yay müqaviləsini yeniləyən Mərt Hakan Yandaşla qapıçı Ərtuğrul Ərçətin də yer alıb. Tədbirdə ən diqqətçəkən sual Cenk Tosuna ünvanlanıb. Belə ki, təcrübəli forvard illər öncə “rəqiblərdən mənə təkliflər həmişə olub və yenə də olacaq. Amma mən az qazansam belə, həmişə “Beşiktaş”ı seçirəm. Mənim üçün az olsun, “Beşiktaş” olsun” ifadələrini işlətmişdi. Həmin sözləri xatırladılan Cenk bunları deyib:
“O zamankı şərtlər məhz bu sözlərə uyğun idi. O vaxt həqiqətən də təklifləri qəbul etməmişdim. Amma indiki şərtlər bu təklifi qəbul etməyimə daha uyğun oldu. Böyük bir camiəyə gəlmişəm. Baş məşqçi ilə cəmi bir saat söhbət edəndən sonra onun layihəsinə inanaraq bu böyük camiənin bir parçası olmaq istədim”.
Ən son xəbərlərə görə “Fənərbaxça” uzun müddətdi danışıq apardığı Yusuf Ən-Nəsiri ilə nəhayət, razılıq əldə edib. “Sevilya” ilə son məşqlərə çıxmayan mərakeşli ulduz forvardla dördillik razılıq əldə olunub. Onun illik qazancı 4 milyon avro təşkil edəcək. İlkin ehtimallara görə bu transfer “Fənər”ə 20 milyon avroya başa gələcək!
Digər xəbərlər
