“Səbail”i Türkiyə komandalarından üstün tutdu
Bilindiyi kimi, “Səbail” Türkiyə toplanışını başa vuraraq iyulun 18-də ölkəyə döndü.
Ərzurumda toplanış keçən “dənizçilər” üç yoxlama oyununda gücünü sınadı. Şahin Diniyevin yeni komanda formalaşdırması sirr deyil. Kollektivə yeni qoşulanlardan biri də “Kəpəz”in sabiq futblolçusu Vüsal Məsimovdu. O, “Football-plus.az” ilə Türkiyə təəsüratını bölüşdü:
“Bəli, artıq təlim-məşq topanışımız yekunlaşdı. Demək olar ki, çox yaxşı keçdi. Öncə güc topladıq, sonra isə taktiki məşqlər etdik. Baş məşqçinin tapşırıqlarını yerinə yetirməyə çalışdıq. Düşünürəm ki, uğurlu alındı. Türkiyədə yaxşı komandalarla oynadıq. Rəqiblərimizi oyun baxımından üstələməyi bacardıq. Düzdü, qələbə qazana bilmədik, amma oyun baxımından yaxşı təcrübə qazandıq”.
24 yaşlı futbolçu gələcək hədəflərindən də söz açdı:
“Məşqçimizin də dediyi kimi, əzmkar və güclü komanda olmaq istəyirik. Baxımlı futbol oynamaq, yüksək yerlər uğrunda mübarizə aparmaq istəyirik. Futbolçu kimi də komandaya kömək etmək, nəticə vermək niyyətindəyəm. Əlimdən gələn hər şeyi edəcəm. Ümid edirəm ki, yeni mövsümdə hər şey “Səbail” üçün yaxşı olar”.
Xatırladaq ki, Vüsal Məsimov iyulun 8-də “Səbail”lə birillik müqavilə imzalayıb.
RÖYANƏ OĞUZ
Digər xəbərlər
