Okan Burukun rəhbərliyi altında yeni mövsümə hazırlığı davam etdirən “Qalatasaray”la bağlı xəbərlər var.

Bilindiyi kimi, Türkiyə çempionu Avstriyanın Qaynberq bölgəsində keçdiyi toplanışı başa vurandan sonra İstanbula dönmüşdü. Bu gün komanda yenidən Avstriyaya, bu dəfə İrdninq bölgəsinə yollanacaq. Buna qədər LASK-a 2:3, Düsseldorf “Fortuna”sına 2:5 uduzan, “Trençin”i isə 4:1 məğlub edən “Cim-Bom” bu dəfə İtaliya təmsilçiləri ilə qarşılaşacaq.
İyulun 24-də rəqib “Leççe”, 27-də isə “Parma” olacaq. Bu arada İstanbul nəhənginin ikinci toplanış üçün heyətə daxil edilməyən futbolçuları bəlli olub. Okan Burukun qərarı ilə Aleksandru Çikıldau, Taylan Antalyalı və Kazımcan Karataş Avstriyaya aparılmayıb. Bundan başqa, Kolumbiya yığması ilə Amerika Kubokunda finala qədər irəliləyən Devinson Sançesin də tətili hələ davam edir. Çikıldau ötən mövsümü icarə əsasında “Konyaspor”da, Antalyalı isə “Samsunspor”da keçirmişdi. Onların hər ikisinin yenidən icarəyə veriləcəyi gözlənilir. Gənc sol müdafiəçi Kazımcan Karataş isə ötən mövsümün ilk dövrəsində Okan Burukun ixtiyarında idi. O hətta “Bavariya”ya qarşı ÇL-də ev oyununda (1:3) start heyətində də meydana çıxmışdı. Amma özünü yaxşı tərəfdən göstərə bilməyən 21 yaşlı sol müdafiəçi ikinci dövrəni icarə əsasında “Ankaragücü”də keçirmişdi. “Qalatasaray”la 2027-yə qədər müqaviləsi olan Kazımcan “Sparta”nın maraq dairəsindədi. Çexlər bu futbolçunu icarəyə götürmək istəyir. Xatırladaq ki, bir neçə gün öncə Praqa təmsilçisi “Qalatasaray”ın daha bir üzvü Matias Rossu icarəyə götürüb.

Bu arada “Qalatasaray”ın “Zenit”in braziliyalı ulduzu Vendelə marağı davam edir. Mərkəz yarımmüdafiəçisi kimi ikiyönlü oynamağı bacardığı üçün Buruk onun transferini israrla tələb edir. Amma “Aslan” üçün bu transferi həyata keçirmək asan olmayacaq. Çünki “Zenit” “Barselona”nın da hədəfində olan “sambaçı”ya görə ən azı 20 milyon avro tələb edir. Sankt-Peterburq nəhəngi bir ara Vendel ilə Kərəm Aktürkoğlunu dəyişməyi təklif etsə də, “sarı-qırmızılar” bundan imtina etmişdi. Buruk rəhbərlikdən müdafiənin sağ cinahının da gücləndirilməsini tələb edib. “Qalatasaray”ın idarə heyətinin üzvü İbrahim Hatipoğlu Vendel ilə bağlı danışıqların davam etdiyini təsdiqləyib. Avqustda 27 yaşı tamam olacaq Vendel “Zenit”ə 2020-ci ildə 20 milyon avro qarşılığında “Sportinq”dən gəlib. Rusiyada heç 4-cü ilini də tamamlamamasına baxmayaraq, o artıq indidən 8 titul qazanıb. Ümumilikdə Vendel “Zenit”in heyətində 125 rəsmi oyunda 20 qol, 27 məhsuldar ötürməlik performans sərgiləyib.