İyulun 3-dən etibarən yeni mövsümün hazırlıqlarına start verən ''Qalatasaray'' Avstriyaya toplanışa yollanmağa hazırlaşır.

Dünən Mauro İkardi ilə Fernando Muslera da tətili başa vuraraq İstanbula gəldi. Onlar tibbi müayinədən problemsiz keçdilər. Argentinalı forvardın artıq çəki ilə bağlı problemi yoxdu. O, tətildən yaxşı formada qayıdıb. Türkiyə çempionu Avstriyaya AÇ-də iştirak edən futbolçularsız yollanacaq. Yəni Kərəm Aktürkoğlu, Barış Alpər Yılmaz, Kaan Ayhan, Yunus Akgün və Əbdülkərim Bardakcı hələ ki, hazırlıqda iştirak etməyəcək. Bundan başqa Rumıniya yığmasının heyətində AÇ-2024-də yer alan Aleksandru Çikıldau və Kolumbiya yığması ilə Amerika Kubokunda çıxış edən Devinson Sançes də düşərgədə olmayacaq.

Qeyd edək ki, ''Qalatasaray'' 11-27 iyul tarixlərində əməkdaşlıq müqaviləsi imzaladığı LASK-ın təşkil etdiyi turnirdə iştirak edəcək. İstanbul nəhəngi iyulun 11-də LASK, 15-də Düsseldorf ''Fortuna''sı, 18-də ''Trençin'', 24-də ''Leççe'' və 27-də ''Parma'' ilə qarşılaşacaq.

ƏLİ