"Gözümüzdə heyəti 70-80 faiz formalaşdırmışıq" - Adil Şükürov
“Kəpəz” mövsümlərarası dövrdəki 3-cü yoxlama oyununu keçirib.
Gəncəlilər ölkəmizdə təlim-məşq toplanışında olan Küveytin "Əl-Yarmuk" klubu ilə qarşılaşıb. Qəbələ şəhər stadionunda keçirilən oyun "sarı-göylər"in 2:1 hesablı qələbəsi ilə yekunlaşıb. Qərb təmsilçisinin heyətində Lassana Ndiaye ilə Kərim Lkuça fərqlənib.
Xatırladaq ki, "Kəpəz" əvvəlki yoxlama oyunlarında "Turan Tovuz"a 0:4, "Şamaxı"ya isə 1:2 uduzub.
“Kəpəz”in “Əl-Yarmuk”la oyundakı start heyəti: Rojerio Paulo Santos, Yeqor Xvalko, Nemət Musayev, Ehtiram Şahverdiyev, Əli Səmədov, Elmir Tağıyev, Ümid Səmədov, Kərim Lkoça, Redon Mihana, Lassana Ndiaye, Manuel Fernandes.
Adil Şükürov bu oyunla bağlı fikirlərini "football-plus.az"la bölüşdü:
“Ağır oyun idi. Hazır olmayan komanda ilə meydana çıxırdıq. Bizə belə qələbə lazım idi. Heyətdə fikirləşdiyimiz oyunçular vardı. Oyunçuların hamısına şans verdik. Gənclər də özünü qismən göstərə bildilər. Bizi dəstəkləmək üçün Qəbələyə gələn azarkeşlər də vardı. Onların hər birinə təşəkkür edirəm. Çalışacağıq ki, qələbələrimizlə onları sevindirək. Yeni legionerlərə də şans verdik, amma hələ hazır deyillər. Gözümüzdə heyəti 70-80 faiz formalaşdırmışıq. Artıq futbolçuların hansı bacarığa sahib olduğunu bilirik. Bundan sonra bir yoldaşlıq görüşümüz də “Pelikan”la olacaq. Ayın 26-da Gəncədə bu rəqibi qəbul edəcəyik. Daha sonra premyer-liqaya hazırlaşacağıq”.
Komandanın yeni transferlərindən Nicat Süleymanov da oyun haqda danışıb:
“Rəqib bu mövsüm elitaya yuksələn komanda idi. Heyətində döyüşkən oyunçular var. Bu yoxlama matçı bizim üçün daha yaxşı alındı. Vacib qollar vurduq. Komanda əvvəlki yoldaşlıq oyunlarındakından daha yaxşı çıxış etdi. Çempionata qədər tam hazır olmağa çalışacağıq”.
RÖYANƏ OĞUZ
Digər xəbərlər
