FİFA qol sevinci üzündən Türkiyədən qalmaqallı şəkildə ayrılan israilli Saqiv Yehezkel ilə bağlı, nəhayət, yekun qərarını açıqlayıb.

Futbolçunun müqavilənin birtərəfli qaydada ləğv olunması tələbi qəbul edilərkən, “Antalyaspor”a da cərimə kəsilib.

Xatırladaq ki, “Antalyaspor”da ilk mövsümünü keçirən İsrail yığmasının üzvü olan Saqiv Yehezkel yanvarın 14-də, yəni ötən mövsümün 20-ci turunda “Trabzonspor”la oyunda qol vurandan sonra İsrailə dəstək verən bir sevinc nümayiş etdirmişdi. Bu olay qısa müddət ərzində o qədər şişmişdi ki, İsrail hökuməti futbolçunu vətəninə qaytarmaq üçün Türkiyəyə xüsusi təyyarə göndərməli olmuşdu. 29 yaşlı oyunçu vətənində böyük qəhrəman kimi qarşılanmışdı. Yehezkel fevralda məsələni FİFA-ya daşımış və “Antalyaspor”dan 1,2 milyon avro təzminat tələb etmişdi. Eləcə də o, müqaviləsinin pozulmasını və azad agent statusuna yiyələnməsini tələb edirdi.

O vaxtdan bəri Təl-Əviv “Makkabi”si ilə məşq etməsinə baxmayaraq, heç bir rəsmi oyuna çıxa bilməyən Yehezkel FİFA-nın qərarını gözləyirdi. “Antalyaspor” indiyə qədər də bu futbolçunun müqaviləsini rəsmi şəkildə ləğv etməyib. Amma FİFA-nın qərarı ilə Yehezkel artıq sərbəst futbolçuya çevrilib. Onun “Makkabi” ilə müqavilə imzalamasının önündə artıq heç bir maneə qalmayıb. Təzminat məsələsinə gəlincə, Yehezkel antalyalılardan 1,2 milyon avro tələb edirdi. Amma FİFA onun bu tələbini geri çevirib. Qurumun qərarına görə Antalya təmsilçisi futbolçuya yanvarın 1-24-ü aralığında görə 45 min, yanvarın 24-dən sonrakı dönəmə görə 35 min avro ödəməlidi. Faizlərlə birlikdə bu məbləğin 100 min avroya çatacağı gözlənilir. “Antalyaspor” by pulu 45 gün ərzində ödəməsə, komandaya cəza veriləcək. “Ağ-qırmızılar”ın onduz da hazırda transfer qadağası var. FİFA-nın qərarının ardından İsrail mətbuatına açıqlamalar verən Yehezkelin vəkili Roi Rosen bunları deyib: “Çox uzun bir gözləntinin, çətin və qarışıq bir prosesin ardından futbolçu, nəhayət, peşəkar karyerasını davam etdirə biləcək”.