Türkiyədə çıxış edən, amma ayrılmaq məcburiyyətində qalan israilli futbolçulardan xəbər var.

"Football-plus.az" xəbər verir ki, məlum olduğu kimi, “Antalyaspor”un israilli üzvü Saqiv Yehezkelin ötən tur “Trabzonspor”a qol vurandan sonra Fələstinlə müharibədə vətəninə dəstək verən jest nümayiş etdirməsi qalmaqala səbəb olmuşdu. Futbolçu klubundan kənarlaşdırılmış, həbs olunmuş və ifadəsi alınandan sonra ölkəsinə deportasiya edilmişdi. Bundan başqa, “İstanbul BŞ”nin israilli futbolçusu Eden Kartsev də sosial şəbəkədə ölkəsinə dəstək verən bir paylaşım etmiş, sonradan onu silmişdi. Başakşəhərlilərin prezidenti Göksəl Gümüşdağ futbolçunun ifadəsinin alındığını, onun üzr istədiyini vurğulamış, amma bütün bunların Kartsevin komandada qalması üçün yetərli olmadığını bildirmişdi. Bu olay gözlənilən sonluqla bitdi. 23 yaşlı futbolçu vətəninə qayıtmalı oldu. O, mövsümün sonuna qədər daimi transfer olunmaq hüququ ilə yanaşı, Təl-Əviv “Makkabi”sinə icarəyə verilib. Kartsev məhz bu klubun yetirməsidi və peşəkar karyerasına da “Makkabi”də başlayıb.

Yehezkelin gələcək taleyi isə hələlik qeyri-müəyyəndi. İki ölkə arasında münasibətlərin gərginləşməsinə səbəb olan və İsrailin Türkiyəyə göndərdiyi xüsusi təyyarə ilə vətəninə yola düşən Yehezkel həmyerliləri tərəfindən əsl qəhrəman kimi qarşılanmışdı. Hava limanına ayaq basandan sonra israillilər onu çiyinlərinə almışdılar! Maraqlıdı ki, Yehezkel ilə “Antalyaspor” arasındakı müqavilə hələ rəsmən ləğv olunmayıb. TFF-nin saytında 28 yaşlı futbolçu hələ də Antalya klubunun üzvü kimi qeyd olunub. Burda tərəflərdən heç biri riskə yol vermək istəmir. Çünki müqaviləni birtərəfli qaydada ləğv edən tərəf təzminat ödəmək məcburiyyətində qala bilər. Yehezkelin “Antalyaspor”la 2026-ya qədər müqaviləsi var. Türkiyə mətbuatının yazdığına inansaq, “Antalyaspor” FİFA-ya göndərdiyi məktubda Yehezkelin komandadan kənarlaşdırılmadığını, öz istəyi ilə vətəninə yollandığını qeyd edib! Bu futbolçuya artıq iki klubdan – Təl-Əviv “Makkabi”si və Beer-Şeva “Hapoeli”ndən rəsmi təklif var. Məsələni qəlizləşdirən daha bir məqam odu ki, Yehezkel mövsümə Beer-Şeva təmsilçisində başlayıb. Bir futbolçunun bir mövsüm ərzində 3-cü kluba transfer oluna bilməsi üçün FİFA-nın xüsusi icazəsi olmalıdı.

“Antalyaspor” mövsümün əvvəlində “Hapoel”ə 800 min avro ödəyərək bu oyunçunu heyətinə qatmışdı. Deyilənə görə, antalyalıların hələ də bu kluba 450 min avro borcu var. Şayiələrə inansaq, Beer-Şeva təmsilçisi həmin 450 min avrodan imtina etməyə, əvəzində Yehezkeli yenidən heyətinə qatmağa hazırdı. Yehezkelə Fatih Terimin çalışdırdığı “Panatinaikos”un da maraq göstərdiyi məlum olub. Maraqlıdı ki, “Antalyaspor”un digər israilli futbolçusu Rəmzi Safuri hələ də komandanın düşərgəsindədi! İdman yazarı Taha Əmrə Özdəmir sonuncu köşə yazısında Safurinin taleyinə aid maraqlı bir detala toxunub. O, klubun başqan vəkili Evren Alkan ilə Safurinin gələcəyi haqda söhbətləşdiyini qeyd edib. Özdəmirin iddiasına görə, klub rəsmisi ona bu sözləri deyib: “Safurinin bu olayla heç bir əlaqəsi yoxdu və o, komandada qalacaq!”