Sərgən Yalçınla yollarını ayıran “Antalyaspor”un Aleks de Souza ilə anlaşdığını xəbər vermişdik.

“Football-plus.az” xəbər verir ki, “Fənərbaxça”nın əfsanəsi sayılan braziliyalı futbol adamı mayın 28-də axşam saatlarında Antalyaya gəldi. Məşqçilik sahəsində təcrübəsi elə də çox olmayan 46 yaşlı mütəxəssisin bu gün “ağ-qırmızılar”la ikiillik müqavilə imzalayacağı gözlənilir. Aleks Antalyada böyük izdihamla qarşılandı. Onu klubun başqan vəkili Dəniz Əli Yeşil və idarə heyətinin bəzi üzvləri qarşıladı. Fanatlar isə fişənglər yandıraraq Aleksin lehinə təzahüratlar səsləndirdilər. Braziliyalı məşqçi hava limanında verdiyi qısa açıqlamada bunları dedi:

“Fənər”də Alekslə birlikdə top qovmuş Mehmet Aurelio “Antalyaspor”da onun köməkçisi olacaq. Aleks məşqçilər korpusuna “Fənər”dəki daha bir sabiq komanda yoldaşı – Semih Şəntürkü də cəlb etmək istəyir. Semih hazırda “sarı-lacivərdlilər”in U-19 komandasını çalışdırır. Onun gələcəyi ilə bağlı hələ ki dəqiq məlumat yoxdu.
Bu arada Antalyada işıq üzü görə “Akdeniz Manşet” nəşrində Aleksin təyinatı ilə bağlı ortaya maraqlı iddia atılıb. Sən demə, məşhur “sambaçı”nın Türkiyəyə gəlişində “Fənərbaxça”nın sabiq tərcüməçisi Samet Güzəlin və onun qardaşı Furkan Güzəlin rolu var imiş. Sametlə Aleks uzun illərdi yaxın dostdu. Furkan isə “Antalyaspor”da adi təcrüməçi kimi çalışırdı və onun mövsüm başa çatan kimi klubdan ayrılacağı gözlənilirdi. Çünki rəhbərlik onun işindən narazı idi. Samet Güzəl illər öncə “Fənər”dən ayrılandan sonra reklam sahəsində çalışmağa başlamışdı. Amma o, bu sahədən bezdiyi üçün yenidən futbola qayıdıb, üstəlik menecer kimi fəaliyyət göstərməyə başlayıb. Samet Güzəl menecer kimi ilk işbirliyini “Antalyaspor”la qurub. O, rəhbərliyə Aleksi kluba gətirə biləcəyini, üstəlik bununla paralel kluba 1 milyon avroluq sponsor tapacağını bildirib. Amma əvəzində hər yeni transferdən komissiya haqqı tələb edib və üstəlik qardaşı Furkanın klubda baş menecer vəzifəsinə gətirilməsini istəyib. “Antalyaspor” rəhbərliyi də onun şərtlərini qəbul edib. Ona görə də yaxın günlərdə klubun baş menecer Seçkin Özdil ilə yollarını ayıracağı və bu vəzifəyə Furkan Güzəlin gətiriləcəyi gözlənilir. Bundan başqa, icraçı direktor Burak Uysaloğlu ilə də yollar ayrılacaq. Qəzetin daha bir iddiasına görə, Samet Güzel hələ ki Aleksin gəlişi üçün kluba vəd etdiyi sponsoru tapa bilməyib. “Eti” və “Papara” şirkətləri “Antalyaspor”a Aleksə görə 1 milyon avro ayırmaq istəməyiblər. Hələ ki bu iddiaların nə dərəcədə doğru olduğu bəlli deyil.