Avstriyada keçirdiyi toplanışla yeni mövsümə hazırlaşan “Qalatasaray”la bağlı xəbərlər var.

Amma bu xəbərlər çətin ki fanatların ürəyincə olsun. Çünki borclarla bağlıdı. İlk xəbər Almaniyadan gəlib. İkinci bundesliqa təmsilçisi “Hannover-96” Derrik Könə görə İstanbul nəhəngindən pulunu tələb edir. Klubun baş müdürü Martin Kind “Bild” nəşrinə açıqlamasında məhkəməyə müraciət etdiklərinə işarə vurub:

Söhbətin konkret hansı məbləğdən getdiyi bilinmir. “Cim-Bom” müdafiənin solunda oynayan 25 yaşlı almaniyalı futbolçunu ötən mövsümün qış fasiləsində 3,35 milyon avroya heyətinə qatmışdı. Kön ikinci dövrədə 15 rəsmi oyuna çıxaraq komandaya 1 qol, 2 məhsuldar ötürməlik fayda verib.

Digər xəbər isə Tete ilə bağlıdı. Ötən saylarımızın birində FİFA-nın Tete mövzusunda yekun qərarını iyunun 4-də yox, 11-də verəcəyini vurğulamışdıq. Həmin tarixdə qurumun Problemli Məsələlərin Həlli üzrə Komitəsi qərarını açıqladı.

Xatırladaq ki, “Qalatasaray” bu başıbəlalı transferi ötən mövsümün əvvəllərində reallaşdırmışdı. FİFA ötən yay Rusiya və Ukaynada çıxış edən legionerlərə iyunun 30-na qədər klublarından ayrılmaq hüququ vermişdi. Yəni həmin tarixə qədər istənilən əcnəbi futbolçu müqaviləni birtərəfli qaydada pozmaq hüququna malik idi. Tete də məhz bu hüquqdan yararlanaraq “Şaxtyor”dan ayrılmış və azad agent statusu ilə “Qalatasaray”la “4+1” illik müqavilə imzalamışdı. Amma Donetsk təmsilçisi Tetenin müqaviləni ləğv edərkən artıq FİFA-nın legionerlərə verdiyi vaxtın tamam olduğunu iddia edərək həm futbolçudan, həm də “Qalatasaray”dan şikayət etmişdi. Digər legionerlərə dərs olsun deyə, “Şaxtyor” sona qədər bu məsələnin üzərində durmaq qərarına gəldi. Nəticədə FİFA-nən qərarı ilə “Şaxtyor”a 2 milyon 389 min 776 avro təzminat ödənilməlidi! Bundan başqa, futbolçunun illik qazancının 5 faizi həcmində məbləğ də donetsklilərin hesabına köçürüləcək.

İndi əsas məsələ odu ki, bu pulu kim ödəyəcək? “Qalatasaray” məsələni İdman Arbitraj Məhkəməsinə (CAS) daşımaqda qərarlıdı. Klubdan verilən məlumatda CAS-a şikayət ünvanlanacağı qeyd olunub. Amma o da bildirilib ki, cəza qüvvədə qalsa və pul klub tərəfindən ödənilsə, həmin məbləğ Tetenin qazancından tutulacaq. Klubla futbolçu arasındakı müqavilədə bununla bağlı xüsusi maddə var. Bu arada Türkiyə mətbuatının iddiasına görə, “Qalatasaray” Tete üçün Braziliyadan çox sərfəli təkliflər alsa da, “sambaçı”vətəninə yollanmaq istəmir. Tete Türkiyədə bonuslarla birlikdə illik 3,5 milyon avro qazanır. “Palmeyras” “sarı-qırmızılar”a 8 milyon avro, futbolçunun özünə isə illik 3 milyon avroya yaxın maaş təklif edib. Amma rəhbərliyin bütün israrlarına baxmayaraq, 24 yaşlı futbolçu Braziliyaya qayıtmaq istəmir. O karyerasını Avropada davam etdirmək arzusundadı. Türkiyədəki ilk mövsümündə enişli-yoxuşlu qrafik cızan Tete “Qalatasaray”da 45 rəsmi oyunda 3 qol, 6 məhsuldar ötürməlik performans sərgiləyib.

“Qalatasaray”ın iyulun 11-də yoxlama oyununda LASK-a 2:3 uduzduğunu xəbər vermişdik. Bu oyunda “Cim-Bom”un qollarını 56-cı və 71-ci dəqiqələrdə Metehan Baltacı vurub. Dünən isə son çempion 2-ci bundesliqa təmsilçisi “Düsseldorf”la qarşılaşıb – 2:5.