Mövsümə uğurlu başlayan “Qalatasaray”ın yaxın günlərdə FİFA ilə başı dərdə girə bilər.

Belə ki, birdən-birə iki klub İstanbul nəhəngindən FİFA-ya şikayət edib! Bunlardan biri “Şaxtyor”du. Bilindiyi kimi, Tetenin Donetsk təmsilçisi ilə ilin sonuna qədər müqaviləsi olsa da, o, bu yay anlaşmanı birtərəfli qaydada pozmuş və daha sonra azad agent statusunda

“Cim-Bom”la “4+1” illik müqavilə imzalamışdı. Hələ avqustun ortalarında “Şaxtyor”un FİFA-ya şikayət edə biləcəyi haqda xəbərlər peyda olmuşdu. Amma “Qalatasaray” rəsmiləri hər şeyin qaydasında olduğunu və bu transferdə qanunsuzluğa yol verilmədiyini iddia etmişdi. Məlum olduğu kimi, FİFA-nın xüsusi qərarı ilə Rusiya və Ukraynada çıxış edən futbolçuların öz klubları ilə müqaviləni birtərəfli qaydada pozaraq başqa kluba keçmək hüquqları var. Tete də məhz bu qaydadan yararlanıb. Ona görə də bu məsələdə “Şaxtyor”un tələbi anlaşılmazdı. Donetsklilər həm Tetenin, həm də “Qalatasaray”ın cəzalandırılmasını tələb edir.

“Sarı-qırmızılar”dan şikayət edən digər klub isə əvvəlki illərdə “Styaua” kimi tanıdığımız FKSB-di. Rumınların dərdi Olimpiu Morutsan ilə bağlıdı. Hərçənd Tete məsələsindən fərqli “Qalatasaray” bu məsələnin FİFA-ya daşındığını rəsmən açıqlamayıb. Rumınların iddiasına görə “Qalatasaray”ın onlara 1 milyon avro borcu var. Morutsanın müqaviləsində Çempionlar Liqası ilə bağlı xüsusi maddə mövcud imiş. “Aslan” ÇL-in qrupuna vəsiqə qazanacağı təqdirdə FKSB-yə əlavə 1 milyon avro bonus ödəməliymiş. Amma məsələ burasındadı ki, Morutsan avqustun 22-də 3 milyon avro qarşılığında “Ankaragücü”yə satıldı. “Qalatasaray” ÇL-in qrupuna vəsiqəni isə avqustun 29-da təmin etdi. Yəni İstanbul nəhəngi iddia edir ki, ÇL-ə vəsiqə əldə ounarkən Morutsan artıq başqa klubun üzvü idi. Ona görə də komanda 1 milyon avronu ödəmək niyyətində deyil. Rumıniyalı jurnalist Emanuel Roşunun xəbərinə görə FKSB artıq FİFA-ya üz tutub Xatırladaq ki, “Qalatasaray” 24 yaşlı vingeri 2 il öncə FKSB-dan 4,2 milyon avroya transfer etmişdi. İlk mövsümdə ümidləri doğrultmayan futbolçu ötən mövsümü icarə əsasında İtaliyanın B seriyası təmsilçisi “Piza”da keçirmişdi.