Hələ ki yeni mövsümün hazırlığına başlamayan və transferdə o qədər də fəal olmayan “Qalatasaray”la bağlı xəbərlər var.

Türkiyənin son çempionu hazırlığa iyulun 3-dən etibarən start verəcək. “Sarı-qırmızılar” srağagün sürpriz bir komanda ilə əməkdaşlıq müqaviləsi imzalayıb. Söhbət Avstriya təmsilçisi LASK-dan gedir. Elitada çıxış edən və ötən mövsümü 3-cü pillədə tamamlayaraq Avropa Liqasına vəsiqə qazanan bu klub Lints şəhərini təmsil edir. “Qalatasaray”ın rəsmi saytında yerləşdirilən məlumatda qeyd olunub ki, iki klub hazırlıq oyunları, turnirlər, oyunçu izləmə kimi məsələlərdə əməkdaşlıq edəcək. Bu əməkdaşlıq yolunda ilk addım iyulun 11-də atılacaq. Həmin vaxt “Qalatasaray” “Summer Series Upper Austria” adlı turnirdə bu komanda ilə qarşılaşacaq. Bu turniri məhz LASK təşkil edəcək. Turnirin digər detalları yaxın günlərdə məlum olacaq. Xatırladaq ki, “Cim-Bom” gələn ay Avstriyada iki toplanış keçəcək. İlk toplanış iyulun 9-18-i aralığında Qaynberq, ikinci toplanış 22-27-si aralığında İrdninq bölgəsində baş tutacaq.

Bu arada ilk mövsümdə ümidləri doğrultmayan və satılması gündəmdə olan Uilfrid Zaha son addımı ilə hər kəsi təəccübləndirib. Təcrübəli futbolçu İstanbula gələrək yeni mövsümə hazırlığa komanda yoldaşlarından daha erkən başlayıb. Sarıyer Bələdiyyəsinə məxsus olan “Çayırbaşı” stadionuna gələn kot d`İvuarlu ulduz burda fərdi məşq edib. Zaha “instaqram”ın hekayə bölümündə məşqdən çəkilmiş şəklini paylaşaraq “work” (çalışma) sözünü yazıb.

Daha bir xəbər odu ki, FİFA Tete ilə bağlı yekun qərarını təxirə salıb. Bilindiyi kimi, “Qalatasaray” braziliyalı vingeri ötən yay heyətinə cəlb edib. Həmin vaxt Tete “Şaxtyor”dan ayrıldığı üçün sərbəst oyunçu statusunda idi. Amma Donetsk klubu bu keçidin rəsmiləşməsindən sonra həm Tetedən, həm də “Qalatasaray”dan FİFA-ya şikayət etmişdi. FİFA ötən il iyunun 30-na qədər Rusiya və Ukrayna klublarında top qovan əcnəbi futbolçulara müqaviləni birtərəfli qaydada ləğv etmək hüququ vermişdi. Tete də məhz bu qaydadan yararlanaraq donetsklilərlə müqaviləsini ləğv etmişdi. “Şaxtyor” iddia edir ki, Tete müqaviləni ləğv edərkən FİFA-nın əcnəbi futbolçulara verdiyi vaxt artıq tamam olmuşdu.

Bir ilə yaxındı davam edən bu anlaşılmazlığa iyunun 27-də son qoyulmalıydı. Amma FİFA hər iki kluba məktub göndərib. Orda qeyd olunub ki, bu məsələyə iyulun 11-də baxılacaq. Türkiyə mətbuatında gedən xəbərlərə inansaq, bu məsələdə “Qalatasaray”ın əleyhinə bir qərarın verilməsi ehtimalı yetərincə yüksəkdi. Deyilənə görə, rəhbərlik özünü hadisələrin ən pis axarına da hazırlayıb. Klubun əleyhinə qərar çıxsa, çox güman, məsələ İdman Arbitraj Məhkəməsinə (CAS) qədər uzanacaq.