“Kəpəz” həm növbəti mövsümə hazırlığı, həm də transfer işlərini sürətləndirib.

Heyətini yenidən formalaşdırmalı olan Gəncə klubu əvvəlki futbolçuların çoxu ilə sağollaşdı. Yaxın müddətdə 10-dan artıq oyunçu düşərgəni tərk etdi. Ayrılanlardan biri də “Kəpəz”ə ötən il qoşulan Kamran İbrahimovdu. 25 yaşlı qolkiper “Neftçi”nin yetirməsi olsa da, karyerasının müəyyən hissəsini “Kəpəz”də - əvvəlcə əvəzedici, ötən ildən isə əsas heyətdə keçirib. Klubdan ayrılmasının səbəbini və gələcək planlarını öyrənmək üçün Kamranla söhbətləşdik.

- “Kəpəz”dən ayrılmağına nə səbəb oldu? Öz istəyinlə ayrıldın, yoxsa...
- “Kəpəz”dən ayrılmağımın səbəbkarı Adil Şükürovdu. Mənlə prinsip apardı. Komandaya gəldiyi gündən məni istəmirdi. Keçmişdə qohumumla aralarında nəsə olub deyə, Şükürov da məni komandadan ayırmaqla acığını çıxdı.

- Bəs planın nədi? Başqa komandalar ilə danışıq aparırsanmı?
- Şükürov məni istəmədiyini vaxtında demədi. Buna görə də gecikdim. Bütün komandalar qapıçı transferini yekunlaşdırıb. Premyer-liqada oynamaq istərdim, ancaq çox çətin görünür. Məcburiyyətdən 1-ci liqadan gələn təkliflərə baxıram.

- Belə çıxır ki, baş məşqçidən incik gedirsən və günahı onda görürsən?
- İncikliyim yazdıqlarımdan bəlli deyilmi?!

- Yaxşı, “Kəpəz”də oynadığın illəri necə xatırlayacaqsan?
- “Kəpəz” gözəl komandadı. Mənim üçün fərqli təcrübə oldu. Bildiyiniz kimi, mən “Neftçi”nin yetirməsiyəm və ilk dəfə başqa klubda forma geyirdim. “Kəpəz”in yaddaşımda yeri başqadı.

- Azərbaycanda kimləri güclü qapıçı kimi görürsən? Yaxud da özünə rəqib kimi?
- Azərbaycanda heç kimi özümə rəqib kimi görmürəm. Futbolçuların çoxu ilə yaxşı münasibətim var. Güc baxımından gənclərdən Rza Cəfərova, Nicat Mehbalıyevə yaxşı qapıçı demək olar.

- Legioner həyatı yaşamaq istərdinmi?
- Ölkə xaricində oynamağı çox istərdim. Xüsusilə hədəfim milli komandaya dəvət almaqdı.

- “Neftçi”nin yetirməsisən, illərin “Kəpəz”də keçdi. “Ağ-qaralar”da forma geyməyi düşünürsənmi, yaxud arzulamısanmı?
- Ora qayıtmaq istərdim. Ancaq real görünmür. “Neftçi” qarşısına böyük hədəflər qoyub. İnanmıram ki, iki il ehtiyatda oturan qapıçını istəsinlər.

- Ölkəmizi avrokuboklarda kim daha yaxşı təmsil edəcək? Hansı komandaları daha şanslı görürsən?
- Bütün komandalarımızın avrokuboklarda nəticə verməsini istəyirəm. Mənim üçün fərqi yoxdu. Əsas odu ki, Azərbaycanı layiqincə təmsil etsinlər. İnanıram ki, bu il hər biri bizi sevindirəcək. Bütün komandalarımıza avrokubok yolunda uğur arzulayıram.

RÖYANƏ OĞUZ