Adil Şükürov "Kəpəz"in planlarını açıqladı - Ayzaya geri dönür?
"Kəpəz" qismən uğurlu keçən 3-cü dövrənin matçlarından sonra premyer-liqanı tərk etmək təhlükəsindən uzaqlaşdı.
Gəncə təmsilçisi 27 xalla turnir cədvəlinin 9-cu pilləsində qərarlaşıb. "Sarı-göylər" "Qəbələ"ni 11 xal qabaqlayır. Amma həlledici qarşılaşmalar irəlidədi. Bəs gəncəlilər 4-cü dövrəyə necə hazırlaşır? Çətin sınaqlardan üzüağ çıxmağı bacara biləcəklərmi?
Bu suallarla "Kəpəz"in baş məşqçisi Adil Şükürova müraciət etdik. Onun "Football-plus.az"a söylədikləri:
"Millinin oyunlarıyla bağlı fasilə olsa da, dincəlmək istəmirik. Komandamızı çətin oyunlar gözləyir. Hər matçda qələbə qazanmaq istəyirik. Məqsədimiz, sadəcə, "Qəbələ"ni yox, şans varsa, bizdən yuxarı yerlərdə olan komandaları da qabaqlamaqdı. Məşqlərimiz davam edir. Şükür Allaha, hər şey qaydasındadı. Zədəlilər tezliklə aramıza qayıdacaq. 4-cü dövrəyə "Qarabağ" matçıyla start verəcəyik. Martın 29-na qədər çox ciddi hazırlaşmaq lazımdı. Vaxt az olduğuna görə yoxlama oyunu keçirməyəcəyik".
Adil Şükürov "Qəbələ"nin futbolçusu Ahmed Ayzayanın növbəti mövsüm "Kəpəz"ə dönəcəyi ilə bağlı iddialara da aydınlıq gətirdi:
"Ümumiyyətlə, onunla maraqlanmamışıq. İstedadlı futbolçudu, lakin belə fikrimiz yoxdu. Hələ ki yeni mövsümün heyətlə bağlı planlarını cızmağa başlamamışıq. İndi fikrimiz qələbələr qazanıb həm azarkeşlərimizi sevindirmək, həm də mümkün qədər irəli getməkdi".
KƏNAN BAHADIR
Digər xəbərlər
