Premyer-liqaya dönən “Şamaxı” yeni heyət formalaşdırır.

Ayxan Abbasovun komandasının uğurları üçün çalışacaq futbolçulardan biri də Rüfət Abbasovdu. “Neftçi”nin əvəzedicilərində çıxış etmiş 19 yaşlı Rüfət həm də U-21-in üzvüdü.

- “Şamaxı”nın yeni transferlərindən birisən. Necə qarşılandın, komandaya uyğunlaşa bilmisənmi?
- Artıq 5 gündü məşqlər başlayıb, hər şey yaxşıdı. Bəli, yerli futbolçuları əvvəldən tanıyırdım. Ona görə uyğunlaşmaqda əziyyət çəkmədim. Burda da klub tərəfindən hər cür şərait yaradılıb.

- Seçim edəndə nəyə görə məhz “Şamaxı”nı seçdin? İstərdim ki, bu barədə danışasan. İlk dəfə premyer-liqadada məhz burda çıxış edəcəksən.
- Ən çox fikirləşdiyim daim oynamaq olub. Eyni zamanda baş məşqçi amili mənim üçün vacib idi. Burda əlimdən gələni edəcəm ki, məşqçilər heyətinin etimadını qazanım və əsas heyətdə yer alım.

- “Neftçi”nin yetirməsisən və əvəzedici heyətində çıxış etmisən. Orda qalıb əsas komandaya keçmək variantı yox idi?
- Neftçi”yə uğurlar arzulayıram. Artıq “Şamaxı”nın futbolçusuyam, ona görə də başqa komanda haqda danışmağım düzgün çıxmaz.

- Ötən mövsüm əvəzedicilərdən bir neçə oyunçu əsas komandada debüt edə bildi. Sən də bunu arzulayardınmı, buna mane olan nə oldu?
- Hələ ki “Şamaxı”da yeniyəm və bütün fikrimi oyunumla burda uğurlu olmağa yönəltmişəm. Keçmiş geridə qalıb. Ona görə də başqa komandalar haqda danışmaq istəmirəm.

- “Şamaxı”ya keçərkən hədəf nə oldu? Yəni bu iki ildə qarşına hansı məqsədi qoymusan?
- İlk növbədə təlim-məşq toplanışında özümü yeni mövsümə tam hazırlayıb çempionatda oyunumu daha da yaxşılaşdırmaq istəyirəm. Ümid edirəm ki, oyunumla “Şamaxı”ya kömək edə biləcəm.

- Bilirik ki, “Şamaxı” premyer-liqaya yenicə qayıdıb, büdcə problemi mövcuddu. Bir futbolçu olaraq, maliyyə sənin üçün hansı sırada durur və bura gələrkən bu məqama fikir verdinmi?
- Hazırda gənc futbolçu sayılıram, mənim üçün indi maliyyədən çox daim oynamaq və oyunumu inkişaf etdirmək maraqlıdı. Bura gəlməyə qərar verərkən maliyyə məsələləri o qədər də önəm daşımırdı.

- Ayxan Abbasovun məşqçiliyinə əvvəldən bələd idinmi, komandaya gələndən sonra onun məşqçiliyində nələr müşahidə edirsən?
- Ayxan müəllim başqa klublarda işiyə adından söz etdirib. Tələbkar məşqçidi, məşqlərimiz də onun rəhbərliyi altında maraqlı keçir. Ayxan müəllimin komandada olması buranı seçməyimin səbəblərindəndi.

- Növbəti mövsüm komandanın hədəfi nə olacaq, sizdən nə tələb olunur?
- Bu mövsüm əsas məqsədimiz premyer-liqada möhkəmlənmək, bacardığımız qədər yuxarı pillələrdə qərarlaşmaqdı.

- Hazırda toplanış necə davam edir?
- İlk günlər olduğundan əsasən fiziki məşqlərə üstünlük verilir, toplanışın sonuna qədər dörd yoxlama oyunu da keçirəcəyik. Mövsümün əvvəlinə qədər tam formada olacağımıza inanıram.

- Köhnə nəsil düşünür ki, indi futbolçunun parlaması daha asandı. Səncə, nəsillər arasında nə kimi fərqlər var?
- Bu barədə danışmaq istəmirəm, hər kəsin öz fikri var, hamının fikrinə hörmətlə yanaşıram.

- Həm də U-21 millimizin üzvüsən. Gənc futbolçu olaraq, istəklərin, hədəflərin nədi?
- Futbolçunun hədəfi həmişə yüksəkdi. Bu gün U-21-dəyəm, daha sonra hər kəs kimi mənim də arzum A milli komandada oynamaqdı. Ayrıca U-21-in baş məşqçisi Samir Əliyevə mənə şans verdiyi üçün təşəkkürümü bildirirəm.

- Özünü gələcəkdə harda görmək istəyirsən?
- Düzünü desəm, top səviyyəli liqalarda oynamaq böyük arzumdu. Və bunun üçün çox çalışmalıyam.

RÖYANƏ OĞUZ