Yeni mövsümə hazırlığı “Fənərbaxça”ya məxsus “Topuq Yaylası” bazasında davam etdirən “Adana Dəmirspor” heyətini tanınmış futbolçu ilə gücləndirib.

"Football-plus.az" xəbər verir ki, söhbət daha öncə uzun illər “Mançester Yunayted”də top qovmuş portuqaliyalı ulduz Luiş Nanidən gedir. Adana klubuna azad oyunçu statusunda qoşulan 36 yaşlı futbolçu ilə “1+1” illik müqavilə imzalanıb. Qeyd edək ki, 2007-14-cü illərdə çıxış etdiyi “Yunayted”də 4 ölkə çempionluğu və 1 ÇL daxil olmaqla 12 titul qazanmış Naninin daha öncə yolu Türkiyədən keçib. O, 2015/16-da “Fənərbaxça”nın şərəfini qoruyub. Həmin vaxt niderlandlı ulduz Robin van Persi də heyətdə idi. Nani “Fənər”də 47 rəsmi oyunda 12 qol, 9 məhsuldar ötürməlik performans sərgiləmişdi. İstanbuldan ayrılandan sonra “Valensiya”, “Latsio”, “Sportinq”, “Orlando Siti”, “Venetsiya”da top qovan tanınmış vinger ötən mövsümü Avstraliya təmsilçisi “Melburn Viktori”də keçirmişdi. Nani həm də Portuqaliyanın heyətində AÇ-2016-nın qalibi olub.

Bu arada tarixində ilk dəfə Türkiyəni avrokuboklarda təmsil edəcəyi və 3 turnirdə mübarizə aparacağı üçün güclü heyət qurmaq istəyən Adana təmsilçisi daha bir məşhur futbolçu ilə danışıqlar aparır. Bir müddət öncə Edinson Kavani ilə maraqlanan, amma maddi məsələlərdə uruqvaylı ulduzla anlaşa bilməyən “Adana Dəmirspor” indi də Raul Ximenesi transfer etməyə çalışır. Türkiyə mətbuatının yazdığına inansaq, danışıqlar prosesində baş məşqçi Patrik Klyuvert də iştirak edir və o, 32 yaşlı meksikalı forvardı Türkiyəyə gəlməyə razı salıb. Ximenes 2018-dən bəri “Vulverhempton”un şərəfini qoruyur. “Canavarlar” onu “Benfika”dan 38 milyon avroya transfer etmişdilər. Bu komanda ilə birillik müqaviləsi qalan Ximenes ötən mövsüm zədə üzündən yalnız 20 rəsmi oyunda iştirak edərək 3 qol vura bildi.