Karyerasını Səudiyyə Ərəbistanında davam etdirən türkiyəli futbolçu Merih Dəmiraldan xəbər var.

Onun şərəfini qoruduğu ''Əl-Əhli'' dünən 18-ci tur çərçivəsində səfərdə ''Əl-Həzm' üzərində 4:0 hesablı inamlı qələbə qazandı. Fasilədə meydana çıxan Merih son 2 qolda yaxından iştirak etdi. O, əvvəlcə aktivinə məhsuldar ötürmə yazdı. Çox keçmədən isə görüşdə yekun nəticəni müəyyənləşdirdi. Bu, Merihin Səudiyyə Ərəbistanı karyerasında vurduğu ilk qol oldu.

Xatırladaq ki, ''Fənərbaxça''nın yetirməsi olan və daha öncə ''Alanyaspor'', ''Sassuolo'', ''Yuventus'', ''Atalanta'' kimi klublarda top qovan 25 yaşlı futbolçu bu yay bonuslarla birlikdə 20 milyon avro qarşılığında ''Əl-Əhli''yə transfer olundu. Oktyabrın əvvəllərində əməliyyat olunan futbolçu təxminən 2 ay topa toxuna bilmədi. Bu üzdən Dəmiral yeni klubunda indiyə qədər cəmi 7 rəsmi oyun keçirib.

Qeyd edək ki, Eduard Mendi, Frank Kessye, Allan Sent-Maksimin, Riyad Mahrez və Roberto Firmino kimi ulduzlar da ''Əl-Əhli''nin şərəfini qoruyur. Bu kollektiv 18-ci turdan sonra 3-cü pillədə qərarlaşıb.

ƏLİ