“Qəbələ”də oynadığım üçün peşman deyiləm” - Bilel Auaşeriya
Son mövsümdə elita ilə vidalaşan “Qəbələ” tezliklə bura dönməyin planlarını cızır.
Baş məşqçi Kaxaber Sxadadze ilk növbəti heyəti ələkdən keçirdi, yarıtmaz legionerlərlə yola davam etməyi lazım bilmədi. Təbii ki, bu, təkcə gürcü mütəxəssisin istəyi ilə olmadı. Belə ki, aşağı dəstədə çıxış etməkdən məmnun olmayanlar ilk fürsəti dəyərləndirərək, yeni klubla anlaşdılar. Sözsüz, onların yerini yerli oyunçular tutdu. Bir neçə oyunçunun müqavilə müddəti davam etdiyindən onları razı salmaq qəbələlilərə ucuz başa gəlmədi. Gücünü 1-ci liqada sınamalı olan Qəbələ təmsilçisi bütün legionerlərlə danışıb, sağollaşdı. Gedənlər arasında bir il öncə kluba gələn fransalı yarımmüdafiəçi Bilel Auaşeriya da var. Hansı ki, “Qəbələ”nin tarixinə bir oyunda üç qol vuran 6-cı futbolçu kimi düşüb. Bəs Bilel Azərbaycandan hansı düşüncələrlə ayrıldı?
30 yaşlı futbolçu ilə əlaqə saxlayaraq, təəssüratını öyrəndik:
“Azərbaycan klublarından bəziləri maraq göstərir, amma hələlik boşam. Hər şey ola bilər. “Qəbələ”dən ayrılmaq qarışıq hisslər idi, klubu birinci liqaya yola salmaq kədərlidi. Amma orda olduğum hər gün edə biləcəyimin artığını etdim ki, bunu da klubdakı insanlar yaxşı bilirlər. Bu ayrılıq, əlbəttə, yaddaşımda iz buraxdı. Mənim üçün bu, unudulacaq bir mövsüm deyil. Çünki aşağı liqaya düşdük. Biz bundan nəticə çıxarmalıyıq. Həm klub, həm də bir futbolçu kimi belə vəziyyətlərdən necə çıxacağımız önəmlidi. “Qəbələ”də oynadığım üçün peşman deyiləm. Təkcə Portuqaliyada oynayan bir futbolçu kimi yeni ölkədə ilk təcrübəm idi. Orda çox şey öyrəndim. Gözəl yerləri olan ölkəni çox bəyəndim. Bu ölkə təkcə Bakıdan ibarət deyil, daha çox kəşf ediləcək yerlərə malik diyardı. Tarixi və zəngin mədəniyyəti olan bir ölkədi. Başlanğıcda dil çətinliyi yaşadım, amma sonda bir az danışdım. “Qəbələ” çox böyük klubdu. Ümid edirəm ki, gələn il premyer-liqaya qayıdacaqlar”.
RÖYANƏ OĞUZ
Digər xəbərlər
