“Səbail” 2023/24 “futbol ili”ni qismən uğursuz keçirdi.

Sabit oyun göstərə bilməyən “dənizçilər”in nəticələri də davamlı olmadı. Nəticədə premyer-liqanın ortababları sırasında olan Bayıl təmsilçisi 7-ci yerlə kifayətləndi. Halbuki rəhbərliyin tələbi fərqli idi. Daha dəqiq desək, 6-cı pillə arzulanırdı. Hər halda, yaşananlar geridə qaldı.

İndi komanda Türkiyənin Ərzurum şəhərində növbəti mövsümə hazırlaşır. Özü də əvvəlkinə nisbətən az büdcəylə. Əlbəttə, belədə azarkeşlərin “Səbail”in gələcəyi üçün nigaran olması anlaşılandı. Bununla belə, kollektivin düşərgəsinə yeni futbolçuların qatıldığı bəllidi. Həmçinin “dənizçilər” qarşıdakı günlərdə üç yoxlama oyunu keçirəcək.

Dünən qeyd olunanlar və başqa mövzular ilə bağlı Bayıl təmsilçisinin baş məşqçisi Şahin Diniyevlə söhbət etdik. Mütəxəssis qəzetimizə açıqlamasında bir çox məqama aydınlıq gətirdi.

– Şahin müəllim, komandanın hazırlıq prosesi davam edir. Son durum necədi?
– Bəli, artıq üç gündü məşq edirik. Gəldiyimiz gün vaxt itirmədən iş başına keçdik. Hər gün iki məşqin keçirilməsi nəzərdə tutulub. Məqsəd keyfiyyətli kollektivin təməlinin qoyulmasıdı. Bilindiyi kimi, son illərdə premyer-liqada temp artıb. Bu üzdən daha çox fikizi hazırlığı ön planda tuturuq. Həmçinin funksional və atletik məşqlər edirik. Növbəti mərhələdə yoxlama oyunlarında futbolçuları sınaqdan keçirəcəyik.

– Əldə etdiyimiz məlumata görə, düşərgədə yeni futbolçular var. Onlar kimdi? Və sizi nə dərəcədə qane edir?
– Mərt Çəlik, Amir Bilali, Qorka Larrusea və Dmitri Litvin bizimlədi. Düzü, bu gün onların vəziyyəti haqda danışmaq istəməzdim. Uyğunlaşmaq üçün zaman lazımdı. Hələ ki yolun başındayıq. Funksional hazırlıq mərhələsindən sonra süzgəcdən keçirib nəsə demək olar. Xoşuma gələn odu ki, bütün oyunçular məşqlərdə əlindən gələni edir. Bir müddət sonra daha yaxşı durumda olacaqlarına inanıram. Ümumiyyətlə, hər biri nə işlə məşğul olduğunun fərqindədi. Məsuliyyətlə və ürəklə çalışırlar ki, verilən tapşırıqların öhdəsindən gəlsinlər. Düzdü, bəzi futbolçular ayrıldığından, yenilər gəldiyindən komandada dəyişikliklər var. Lakin mən həmin məşqçiyəm. Peşəm elədi ki, oyunçu məndən qorxmamalı, hörmət etməlidi. Prinsipim budu.

– Dəyişiklik demişkən, ötən mövsüm start heyətində görünənlərin əksəri artıq “Səbail”dən ayrılıb. Komandanı toparlayacağınıza inanırsızmı?
– Təbii ki! İnam həmişə olmalıdı. Mən həmin məşqçiyəm, futbolçularla eyni üslubda işləyirəm. Bəli, gedənlər çoxdu. Valdemar Pana, Aleksandr Ramalinqom, Pedro Nuno, Nil Bardea, Ayub Masika kimi legionerlər də yola salınıb. Komandanının azı 50 faizini yenidən formalaşdırmalı olduq. Əkbəttə, buna təəssüflənirəm. Çünki belə hallar məşqçinin işimi çətinləşdirir. Ona görə ki, yeni gələnlərin uyğunlaşması üçün əlavə vaxta ehtiyac olacaq.

– Yeni transferlər arasında qapıçı yoxdu. Bu mövqeyə futbolçu axtarırsızmı? Belədisə, legioner, yoxsa yerli futbolçu gətirəcəksiz?
– Bilindiyi kimi, Hüseynəli Quliyev yetərincə savadlıdı. Qismət olsa, onun xidmətindən yararlanmaq niyyətindəyəm. Məncə, bu gün peşəkar futbolda “çərçivə”ni qorumağa hazırdı. Ona inanıram. Əlavə qapıçı da almışıq. “Difai Ağsu”nun gənc gutbolçusu Əlirza Müştəbazadə bizimlədi. Həmçinin akademiyamızdan üçüncü qapıçı da cəlb edəcəyik.

– Başqa hansı mövqelərin gücləndirilməsi nəzərdə tutulub? Transfer çalışmalarının bitdiyini deyə bilərik?
– Tam yox, amma bitmək üzrədi. Yerli oyunçularla bağlı proseslərə yekun vurulub. Həm hücuma, həm də müdafiəyə meyilli futbolçu axtarırıq. Bundan başqa, keyfiyyətli hücumçu tapmaq istəyirik. Seleksiyaçılar, demək olar ki, bütün gününü buna həsr edir. Mümkün variantlar arasından ən yaxşısını seçmək istəyirik.

– Büdcənin azaldılması bu yöndə işlərə nə dərəcədə mənfi təsir edir? Konkret hansı çətinliklərlə üzləşirsiz?
– Futbolda belə hallara tez-tez rast gəlmək mümkündü. Maddi durumun yaxşı olması da problem yarada bilir, pis olması da. Hərəsinin özünə görə çətinliyi var. Lakin böyük çatışmazlıqlarla üzləşdiyimizi düşünmürəm. Seçimlər düzgün olsa, istənilən büdcə ilə keyfiyyətli komanda qurmaq olar. Büdcənin azalması tək qalmaq demək deyil. Sponsorlar yanımızdadı.

– Sonda “Səbail”in növbəti mövsüm üçün cizgilərini necə cıza bilərsiz? “Dənizçilər”in yeganə məqsədi iddia olunduğu kimi, premyer-liqada qalmaq olacaq? Yoxsa azı ötən mövsümdəki nəticəni təkrarlamaq?
– Hələ ki bu barədə danışmaq üçün tezdi. Komandanın komplektləşdirilməsi bitəndən və futbolçuların tam potensialına bələd olandan sonra daha dəqiq nəsə demək olar. Onu bilirəm ki, hədəf, sadəcə, premyer-liqada qalmaq deyil. Ümumiyyətlə, autsayderlər sırasında qərarlaşmaq fikrimiz yoxdu. Gücümüz çatan qədər çalışacağaq ki, maksimum nəticə göstərək. Həm rəhbərlik, həm məşqçilər korpusu, həm də futbolçular yaxşı nəticələr qazanmağa köklənib. Uçurumda deyilik ki! Futbol oynayacağıq...

Xatırladaq ki, “Səbail” iyulun 11-də 1-ci liqa təmsilçisi “Ərzurumspor”, 13-də isə superliqa iştirakçısı “Hatayspor” ilə qarşılaşacaq. Sonucu rəqib və oyunların başlama vaxtıyla bağlı hələ ki məlumat yoxdu. Türkiyə toplanışı iyulun 18-dək davam edəcək.

KƏNAN BAHADIR