Rəşad Məmmədov: “Səbail”in premyer-liqada iştirak edə bilmək üçün normal büdcəsi var”
Misli premyer-liqasında mövsümün başa çatmasından cəmi 4 gün keçib.
Buna baxmayaraq, artıq bir neçə klub yeni “futbol ili”ndə daha uğurlu nəticələr qazanmaq məqsədiylə ilkin addımlarını elan etdi. “Araz-Naxçıvan” heyətin formalaşdırılması prosesinə start verdi, baş məşqçi Elmar Baxşıyevlə yenidən anlaşdı. “Turan Tovuz”da sürpriz ayrılıq yaşandı. Daha dəqiqi, baş məşqçi Ayxan Abbasov qarşılıqlı razılıq əsasında klubdan ayrıldı. Dünən axşam saatlarında ictimaiyyətə elan edilən növbəti yenilik isə “Səbail”in baş məşqçisi Şahin Diniyevlə bağlı oldu. Belə ki, 57 yaşlı mütəxəssis daha bir il “dənizçilər”ə rəhbərlik edəcək. Halbuki yerli mətbuatda klub rəhbərliyinin Diniyevin fəaliyyətindən narazı qaldığı, bu üzdən onunla müqaviləyə xitam veriləcəyi tirajlanırdı. Görünür, “Səbail”in 42 xal toplamaqla turnir cədvəlinin 7-ci pilləsində qərarlaşması Müşahidə Şurasını qane edib. Düzdü, komanda 2022/23 mövsümü ilə müqayisədə daha yaxşı nəticə göstərib. Bu öz yerində. Lakin bu nəticədən daha artığına nail olmaq mümkün deyildimi?
Əlbəttə, Bayıl təmsilçisiylə bağlı yeganə məlumat bu deyil. Axı kapitan, təcrübəli müdafiəçi Adil Nağıyev komandadan ayrılıb. Niyə? O, səbəbi öz “instaqram” hesabında belə izah edib:
“5 il formasını geydiyim “Səbail”lə yolları ayırmaq qərarına gəldik. Üzərimdə əməyi olan hər kəsə təşəkkürümü bildirirəm. Baş məşqçi, rəhbərlik, komanda yoldaşlarım, hər bir azarkeşə minnətdaram. Hər şey üçün təşəkkürlər. Hər zaman qəlbimdə olacaqsız. Bir gün görüşmək ümidi ilə”.
Bəli, 28 yaşlı oyunçu 2019-cu ilin yayından “Səbail”də çıxış edirdi. Digər tərəfdən, onun mesajının üzərindən bir neçə gün keçsə də, klub hələ də ayrılıq haqda rəsmi məlumat yaymayıb. Növbəti məsələ isə büdcəylə bağlıdı. İddialara görə, dünən səhər saatlarında keçirilən klubdaxili iclasda baş sponsoru “Xəzər Dəniz Gəmiçiliyi” (ASCO) başa çatan mövsümdə ayırdığı 9 milyon manatlıq büdcəni 40 faiz azaldıb. Beləliklə, yeni mövsümdən avrokuboklara vəsiqə qazana bilməyən Bayıl təmsilçisinin büdcəsi maksimum 5 milyon manat olacaq.
Qeyd olunan məsələlərlə bağlı ətraflı məlumat üçün paytaxt klubunun Media və Marketinq şöbəsinin rəhbəri Rəşad Məmmədovla əlaqə saxladıq. O, qəzetimizə açıqlamasında ümumi durum haqda informasiyalara aydınlıq gətirdi:
“Şahin Diniyevlə bağlı məsələ sadədi. Müşahidə Şurasının qərarına əsasən baş məşqçiylə müqavilənin müddəti bir il artırıldı. Növbəti günlərdən etibarən rəhbərlik və məşqçilər korpusu tərəfindən heyətin komplektləşdirilməsinə başlanılacaq. Adil Nağıyevə gəlincə, o, müqaviləsinin müddəti başa çatan futbolçulardan biridi. Bəli, məlumatı özü paylaşıb. Biz hələ ki nəsə elan etməmişik. Komandaya yeni gətiriləcək və yollarımızı ayıracağımız futbolçuların kimliyinə baş məşqçimiz qərar verəcək. Büdcəylə bağlı mövzunun bu qədər aktual olması isə qəribədi. Bu mövzunun niyə bu qədər ajiotaj yaratdığını bilmirik. Geridə qalan mövsüm ərzində mətbuatda maliyyə məsələlərimiz haqda kifayət qədər şişirdilmiş rəqəmlərdən bəhs edildi. Yanlış məlumatlar verildi. Hələ də anlamırıq ki, məqsəd nədi... Qısası, “Səbail”in premyer-liqada iştirak edə bilmək üçün normal büdcəsi var”.
KƏNAN BAHADIR
Digər xəbərlər
