“Kurban Berdıyevin "Turan Tovuz"a gəlişindən məlumatim yox idi. Nömrələri tez-tez dəyişdiyindən son illər əlaqəmiz olmayıb. Hətta axırıncı dəfə iki-üç il əvvəl telefonda danışmışdıq. Daha sonra ara-sıra Antalyada oyunlarda da görürdüm. Şəxsən görüşdüyümüz 5 il olar. Bu il də görüşməliydik, qismət olmadı... Tovuz komandasını çalışdırmasına gəlncə, buna ancaq sevinmək olar. Təcrübəli mütəxəssisdi. Öz sözünü deyib, piar baxımından da tanınır. Ortabab klublarda çətin şəraitdə nəticə verə bilib. “Rubin”də, "Rostov"da gücünü göstərib. Başqalarını da sadalamaq olar. İşləmək həvəsi də var. Bizdə belə bir düşüncə var ki, məşqçinin yaşı çoxdusa, təqaüdə yollanmalıdı. Bəzən belədi. Ancaq Berdıyev, Syomin və elə məşqçilər var ki, daim futbolun nəbzini tuturlar, zamanla ayaqlaşırlar. Seminarlara gedir, oxuyur və öyrənirlər. Bilirəm ki, Berdıyev də bu mənada bir saniyə belə dayanmır. Həmişə Avropaya hansısa məşqçilərin yanina gedir, müzakirələr aparır. Bir sözlə, çox yaxşı seçimdi. "Turan Tovuz"u qoyaq bir qırağa, Kurban müəllimin klub quruculuğunda böyük təcrübəsi var. Akademiya necə çalışmalıdı, bir komanda kimi necə işlər gorulməlidi - bunlarin hər birini çox yaxşı bilir. İşində də bir qayda olaraq, ispan mütəxəssislərə üstünlük verir. Yəni uşaq futbolu, akademiya məşqçiləri, reabilitoloqlar və başqalarını bu praktikaya uyğun seçir. Fikrimcə, “Turan Tovuz”u klub kimi tam formalaşdıra bilər. Məsələn, ona Ayxan Abbasovdan fərqli büdcə veriləcək. Həmin büdcə ilə daha böyük islər görmək olar. Ruslan Abışovun da futbol karyerası bəlllidi. Berdıyevin yanına təcrübəyə getmək üçün çox şeyləri hədər verdi. Kurban Berdıyev həmişə əvvəldən çalışdığı futbolçuya dəstək verir. Rusiyada da məşqçi olanda ondan dəstək görən onlarla gənc məşqçi var. Məsələn, "Traktor"da çalışarkən ozü ilə Dmitri Kleşenkonu apardı. Belə nümunələr çoxdu. Əvvəl-axır Azərbaycan futboluna Berdıyevın bəxş edəcəyi adamlar lazımdı. Ruslan Abışov bunlardan biridi. İnsan olaraq da, futbolcu olaraq da realdı. Yəni Kurban bəyin köməkçilərindən biri Ruslan ola bilər. Berdıyev həm də yeni futbolçuları üzə çıxara bilir. Elə olub ki, heç kimin ümid bəsləmədiyi futbolçunu ulduza çevirib. Həm məşqçilərin inkişafında çox böyük rol oynaya, həm də klub quruculuğunda böyük təcrübəsini bölüşə bilər. Qurban Qurbanov "Qarabağ"ı necə qurubsa, Berdıyev də bir növ o rolu oynaya bilər. İstənilən sahədə əlaqələri də çox genişdi. Nəinki “Turan Tovuz”a, Azərbaycan futboluna böyük xeyri dəyə bilər. Hələ bunun piar tərəfini demirəm”.