Kapitan Kurban Berdıyev haqda nə dedi?
Artıq “Turan Tovuz”un yeni baş məşqçisinin Kurban Berdıyev olacağı bəllidi.
Həmçinin Tovuz klubunun sabiq məşqçisi Ayxan Abbasovun “Şamaxı”ya təyinatı da rəsmiləşib. Bəs Berdıyevin Tovuza gəlişi komanda tərəfindən necə qarşılanıb? Başverənlərlə bağlı fikirlərini öyrənmək üçün “Turan Tovuz”un kapitanı Şəhriyar Əliyevə sual ünvanladıq:
“Yeni baş məşqçinin gəlişi barədə məlumatım yox idi. Oyunçuların hər biri istirahətdədi. Hələ özüylə görüşməmişik. Ayın sonu komanda yığılacaq. Hamılıqla baş məşqçi ilə görüşəcəyimiz günü gözləyirik. Hər kəs əl-ələ verərək yaxşı nəticələr üçün çalışacaq. Son iki ildə yeni uğurlarımız oldu ki, bundan sonra da davamını gətirmək istəyirik. Məşqçimizin karyerasını bilirik, harda, hansı nəticələr qazandığınından xəbərdarıq. Kollektiv olaraq, daha böyük uğurlar qazanmağa çalışacağıq”.
Təcrübəli futbolçu “sabiq məşqçiniz Ayxan Abbasovu “Şamaxı”ya təyinat alması münasibəti ilə təbrik etmisən” sualımıza isə belə cavab verdi:
“Yox, hələ danışmamışam. Bayaq bildim ki, Ayxan müəllim "Şamaxı" ilə müqavilə imzalayıb. Ona, sadəcə, uğurlar arzulayıram. İnanıram ki, buna qədər qurduğu kollektiv və uğurları Şamaxıda da təkrarlayar”.
RÖYANƏ OĞUZ
