Superliqada mövsümü 6-cı pillədə bitirməsinə baxmayaraq, ölkə kubokunu qazanan “Beşiktaş”da məşqçi axtarışı davam edir.

“Football-plus.az” xəbər verir ki, Sərgən Yalçın əsas namizəd kimi qalsa da, rəhbərlik başqa məşqçilərlə də təmas qurmaqda davam edir. Başqan Hasan Arat, ikinci başqan Hüseyin Yücel, futbol şöbəsinin rəhbəri Feyyaz Uçar və baş əlaqələndirici Samet Aybaba yeni baş məşqçini müəyyənləşdirməyə çalışırlar. Rəhbərliyin danışıqlar apardığı məşqçilərdən Joze Mourinyo “Fənərbaxça”ya yollanmağa, Razvan Luçesku isə çempion olduğu PAOK-da qalmağa üstünlük verdi. Dortmund “Borussiya”sında köməkçi kimi çalışan Nuri Şahinlə təmaslar davam edir. Bu arada rəhbərliyin gündəminə gələn son isim Slaven Biliçdi. “Beşiktaş” camiəsinə gözəl tanış olan təcrübəli xorvatiyalı mütəxəssis ötən ilin iyulundan bəri “Əl-Fateh”i çalışdırır. Onun Səudiyyə Ərəbistanı təmsilçisi ilə hələ birillik müqaviləsi var. Amma Türkiyə mətbuatının yazdığına inansaq, 55 yaşlı Biliç “Qartal”ın təklifindən sonra düşünmək üçün bir qədər vaxt istəyib. Qeyd edək ki, “ağ-qaralar” daha öncə Biliçin başçılığı altında həm 2013/14-ü, həm də 2014/15-i 3-cü pillədə tamamlayıblar. İstanbul nəhəngi həmin dönəmdə bu məşqçi ilə ümumilikdə keçirdiyi 89 rəsmi oyundan 47 qələbə, 21 heç-heçə, 21 məğlubiyyətlə ayrılıb. “Beşiktaş” Biliçlə kubok qazana bilməmiş və derbi oyunlarında da zəif nəticələr göstərmişdi. İngiltərə mətbuatında isə Ole-Qunnar Sulşerin də namizədlər arasında olması haqda xəbərlər peyda olub. “Beşiktaş” Sulşerlə geridə qoyduğumuz mövsümün ilk dövrəsində, daha dəqiq desək, Fernando Santuşdan öncə də təmas qurmuş, amma anlaşa bilməmişdi.

Bu arada “Beşiktaş”da yayın ikinci ayrılığı reallaşıb. Daha öncə müqavilə müddəti bitən Co Uorrall ilə vidalaşan “Qartal” bu dəfə Rəşid Gezzal ilə sağollaşıb. Təcrübəli futbolçu sosial şəbəkədə paylaşım edərək 4 il şərəfini qoruduğu komanda ilə vidalaşıb. O, həyatının sonuna qədər bu klubun fanatı kimi qalacağını vurğulayıb. “Beşiktaş” da öz növbəsində Gezzal üçün vida paylaşımı edib. 32 yaşlı əlcəzairli vinger 2020-ci ildən “ağ-qaralar”ın şərəfini qoruyurdu. İlk mövsümdə, yəni 2020/21-də o, superliqada 31 qarşılaşmada 8 qol, 17 məhsuldar ötürməlik yaddaqalan performans sərgiləyərək çempionluqda mühüm rol oynamışdı. Amma sonrakı mövsümlərdə zədə və başqa amillər üzündən ümidləri doğrulda bilmədi. Ümumilikdə Gezzal “Beşiktaş”da 123 rəsmi oyuna çıxaraq 17 qol, 33 məhsuldar ötürməlik fayda verdi və 4 titul qazandı.