İtaliyalı Roberto De Zerbinin ayrılığından sonra məşqçi axtarışında olan ''Brayton'' diqqətini sürpriz ismə yönəldib.

“Football-plus.az” xəbər verir ki, İngiltərə mətbuatının yazdığına görə üç əsas namizəddən biri Fabian Hürtselerdi. Onun ən diqqətçəkən özəlliyi isə cəmi 31 yaşının olmasındadı. Yəni Hürtseler premyer-liqa tarixində daimi əsasda baş məşqçi kimi çalışmış ən gənc mütəxəssisə çevrilə bilər. Düzdü, 2021-də Joze Mourinyonun istefaya göndərilməsindən sonra ''Tottenhem''i 29 yaşlı Rayan Meyson çalışdırmışdı. Amma həmin vaxt o, sadəcə müvəqqəti məşqçi funksiyasını icra edirdi. Hürtseler geridə qoyduğumuz mövsümdə ''Sankt Pauli''ni 2-ci bundesliqanın çempionu etmiş və 13 illik fasilədən sonra elitaya qaytarmışdı. 2022-ci ildə o, cəmi 29 yaşında ''Sankt Pauli''nin başına keçmiş və klub tarixinin ən gənc məşqçisi olmuşdu. Maraqlıdı ki, Hürtseler məşqçi lisenziyasını yalnız ötən ilin aprelində alıb. Gənc almaniyalı mütəxəssis ABŞ-da doğulub və Almaniyanın aşağı liqa klublarında top qovub. 2016-20-ci illərdə o, Bavariya bölgəsini təmsil edən həvəskar ''Pipinsrid''də oynayan məşqçi kimi fəaliyyət göstərib. Hürtselerdən başqa Henrik Ridstrom və Qrem Potter də ''Brayton''un başına keçməyə namizədlər arasındadı. Sonuncu ''Brayton'' fanatlarına gözəl tanışdı. Belə ki, 2019-22-ci illərdə artıq bu klubu çalışdırıb.

ƏLİ