Türkiyənin son çempionu “Trabzonspor” acı xəbərdən sarsılıb.

Trabzon təmsilçisinin tarixinin ən önəmli isimlərindən biri, bəlkə də birincisi olan Ahmet Suat Özyazıcı dünyasını dəyişib. Uzun müddətdi səhhəti ilə bağlı problem yaşayan və Altsheymer xəstəliyindən əziyyət çəkən Özyazıcı fevralın 18-də 87 yaşında gözlərini əbədi yumub.

Klubun tarixində bu futbol adamının həmişə öz yeri olub. Çünki Trabzon şəhərində futbola olan sevginin yeni səviyyəyə yüksəlməsində məhz Özyazıcı mühüm rol oynayıb. Bilindiyi kimi, “Trabzonspor” 1967-ci ildə Trabzondakı bir neçə klubun birləşməsindən yaranıb. Özayazıcı əvvəlcə futbolçu, sonra da köməkçi-məşqçi kimi kluba xidmət etdikdən sonra 1972/73-ün 2-ci dövrəsindən etibarən baş məşqçi funksiyasını icra etməyə başlayıb. İlk mövsümdə aşağı liqada cəmi 1 top fərqi çempionluğu qaçırsa da, 2-ci mövsümdə komandanı çempion edərək ilk dəfə elitaya daşıyıb. Elitadakı 2-ci mövsümündə, yəni 1975/76-da “Trabzonspor”la çempion olaraq İstanbul nəhənglərinin hegemonluğuna son qoyub. Özü də həmin an onun cəmi 40 yaşı var idi. Növbəti mövsüm bu uğuru yenidən təkrarlayan mütəxəssis fanatların gözündə əfsanə statusuna yüksəlsə də, gözlənilmədən ayrılmaq qərarına gəlib və onu Özkan Sümər əvəzləyib. Sonrakı illərdə bu iki mütəxəssis, bir qayda olaraq, bir-birini əvəzləməyə başlayıb. Ümumilikdə 8 (!) fərqli dönəmdə “Trabzonspor”u çalışdıran Özyazıcı hesabına daha iki (1979/80, 1983/84) çempionluq əlavə edərək adını klub tarixinə qızıl hərflərlə yazdırıb. O, ölkə futbolu tarixində Fatih Terimdən (8) sonra ən çox çempionluq yaşamış 2-ci məşqçidi. Sonuncu dəfə qaradənizlilərin başına 1999/00-də keçən, amma 14 oyundan sonra istefa verməli olan mütəxəssis ümumilikdə bu klubda 13 titul qazanıb. “Trabzonspor”dan başqa yalnız “Bursaspor” (1988) və “Sarıyer”i (1990-92) çalışdırıb. Tanınmış futbol adamı “Trabzonspor”da ən son 2010-cu ildə məşqçilər korpusu və rəhbərliyin baş məsləhətçisi vəzifəsini icra etmişdi. İndiki baş məşqçi Abdulla Avcı ötən mövsüm çempionluğa bir neçə həftə qalmış Özyazıcını ziyarət etmişdi.