Tura şənbə günü keçirilən iki oyunla start verildi.

"Football-plus.az" xəbər verir ki, “Axmat” gözlənilmədən evdə “Fakel”ə uduzmaqla ardıcıl 4-cü turu xalsız tamamladı. Bu, komandanın 2017-nin avqustundan bəri ən pis seriyasıdı. Yaxşı forma yığan “Zenit” isə səfərdə debütant “Baltika”nı 2-ci hissədə vurduğu qollarla məğlub etdi. Piterlilərin rəsmi matçlarda qələbə seriyası 6 oyuna çatdı. Maraqlıdı ki, “Zenit” çempionat çərçivəsində tarixində ilk dəfə “Baltika”nı məğlub etdi! Komandalar elitada daha öncə 1998-ci ildə qarşılaşmış və Sankt-Peterburq nəhəngi o vaxt 2 oyuna yalnız 1 xal toplamışdı. “Zenit” Rusiya çempionatı çərçivəsində 49 fərqli komanda ilə qarşılaşıb və onlardan yalnız birini – “Asmaral”ı məğlub edə bilməyib (2 oyun, 2 məğlubiyyət).

Bazar günü daha 3 görüş keçirildi. Mövsümə fırtına kimi başlayan, amma son 2 oyunda yalnız 1 xal toplayan “Krasnodar” tura 3-cü pillədə daxil olan “Krılya Sovetov” üzərində vacib qələbə qazandı. Premyer-liqda ardıcıl 14-cü ev oyununda uduzmayan “Krasnodar” bu qələbə sayəsində liderliyini davam etdirdi. “Krılya Sovetov”un isə deyəsən, yavaş-yavaş gücü tükənir. Samara təmsilçisi 10-cu turda “Spartak” üzərində qazandığı 4:0 hesablı tarixi qələbədən bəri keçirdiyi 4 oyunda yalnız 1 xal toplayıb. ÇSKA “Nijni Novqorod”la ev oyununda əzmkar qələbə qazanaraq 3-cü pilləyə yüksəldi. “Hərbçilər”in evdəki məğlubiyyətsiz seriyası 9 oyuna çatdı. Bu, komandanın 2016/17-dən (13) bəri ən yaxşı seriyasıdı. Turun mərkəzi oyunu isə Moskva derbisinə təsadüf etdi.

“Spartak” Xluseviçin 38-ci dəqiqədə “son ümid folu”na görə qırmızı vərəqə almasının ardından uzun müddət azlıqda oynamaq məcburiiyyətində qaldı. Buna baxmayaraq, komanda 2-ci hissənin əvvəllərində hesabı açdı. Amma Dzyuba “Lokomotiv”i məğlubiyyətdən xilas etdi. Təcrübəli forvard karyerası ərzində “Spartak”a qarşı keçirdiyi 18-ci rəsmi oyunda 8-ci qolunu vurdu. Bu nəticə tərəflərdən heç birinə sərf etmədi. Çünki onların hər ikisinin liderlə xal fərqi 10-a çatdı. Onu da bildirək ki, “Spartak” premyer-liqa çərçivəsində Moskva klublarına qarşı keçirdiyi ardıcıl 10-cu oyunda uduzmadı. Bu, 2005-07-ci illərdə qeydə alınmış 14 oyunluq məğlubiyyətsiz seriyadan bəri komandanın ən yaxşı göstəricisidi.