Nəhayət, “Bavariya”da baş məşqçi problemi həllini tapıb.

“Football-plus.az” xəbər verir ki, Almaniya nəhəngi bir sıra mütəxəssislərdən rədd cavabı alandan sonra seçimi Vensan Kompaninin xeyrinə etmişdi.

Münhenlilərin “Bernli”nin baş məşqçisi ilə danışıqları müsbət nəticələnmişdi. 38 yaşlı mütəxəssisin Tomas Tuxelin boşaltdığı postu tutacağı gözlənilirdi. Amma “Bavariya” onunla rəsmi müqavilə bağlamazdan əvvəl “Bernli” ilə təzminat məsələsini yoluna qoymalıydı. Münhenlilər İngiltərə klubuna 10 milyon avro təklif etsələr də, qarşı tərəf bundan iki dəfə çox istəmişdi. Klubların 15 milyon avro təzminatla bağlı razılığa gəldiyi məlum olub. Nəticədə gənc mütəxəssis yeni klubu ilə müddəti 2027-ci ilə qədər nəzərdə tutulan müqavilə bağlayıb.

Kompani “Bernli”ni 2022-ci ildən çalışdırırdı. Komanda premyer-liqanın yenicə başa çatan mövsümündə 19-cu yeri tutub və 2-ci diviziona düşüb.