Türkiyədə transfer dönəmi başa çatsa da, “Fənərbaxça” hələ də heyətdə belə desək, “təmizlik” işi aparır.

Football-plus.az xəbər verir ki, cari “futbol ili”ndə Türkiyə çempionatında klublara mövsümlük iştirak ərizəsinə maksimum 14 əcnəbi oyunçunun adını salmağa icazə verilib. Legioner bolluğundan əziyyət çəkən “Fənər”də üç futbolçu – Filip Novak, Maurisio Lemos və Armindo Bruma bu “14-lük”dən kənar qaldı. Brumanın durumu bir qədər fərqlidi. Çünki o, kluba bu yay gəlib. Zədələrdən əziyyət çəkən və baş məşqçi Jorje Jezuşun gözünə girə bilməyən portuqaliyalı klubdan ayrılmayacaq. İkinci dövrə üçün iştirak ərizəsində dəyişiklik etməyə icazə verilir və ola bilər ki, onun adı yanvarda siyahıya salınsın. Novak və Lemos isə aqibəti ilə barışaraq klubdan ayrılmalı olub. Artıq Novakın ayrılması klub tərəfindən rəsmən təsdiqlənib. Çexiyalı müdafiəçinin “sarı-lacivərdlilər”lə müqaviləsinin müddəti gələn yay başa çatırdı. Tərəflər qarşılıqlı razılıq yolu ilə müqaviləni ləğv ediblər. Futbolçuya təzminat verilib-verilmədiyi bilinmir.

Qeyd edək ki, 32 yaşlı futbolçu 2020-nin yayında “Trabzonspor”dan ayrılandan sonra azad agent statusunda “Fənər”ə keçmişdi. Novak geridə qalan iki mövsümdə 51 rəsmi oyuna çıxaraq 4 qol, 3 məhsuldar ötürmə ilə fərqləndi. Sabiq klubu “Trabzonspor” bu müddət ərzində 3 titul qazandığı halda Novak “Fənərbaxça”da titul qazana bilmədi! Bu məqamda xatırladaq ki, İstanbul nəhəngi 8 ildi titul üzünə həsrətdi. Türkiyə mətbuatının yazdığına inansaq, Novak BƏƏ təmsilçisi “Əl-Cəzirə” ilə ilkin razılıq əldə edib. Lemosa gəlincə, onun durumu hələ ki rəsmiləşməyib. Uruqvaylı müdafiəçinin BƏƏ təmsilçisi “Baniyas”dan təklif aldığı və danışıqların davam etdiyi deyilir. 26 yaşlı futbolçu “Fənər”ə 2020-nin yayında 1,5 milyon avroya transfer olunmuşdu. Amma Lemos özünü yaxşı tərəfdən göstərə bilmədi və ilk mövsümdə “Beşiktaş”a qarşı evdəki derbidə qeydə alınan 3:4-lük məğlubiyyət zamanı yol verdiyi səhvlərdən sonra gözdən düşdü. Ötən mövsümün 2-ci dövrəsini “Beershot”da icarədə keçirən Lemos ümumilikdə “Fənər”in heyətində cəmi 15 rəsmi oyuna çıxa bildi.

ƏLİ