A seriyasında mövsümün sonuncu turuna həftənin qeyri-adi günündə - cümə axşamı start verildi. Bu, səbəbsiz deyildi.

“Football-plus.az” xəbər verir ki, bilindiyi kimi, “Fiorentina” ardıcıl ikinci dəfə Konfrans Liqasının finalına vəsiqə qazanıb. Yerli liqanın rəhbərliyi “Olimpiakos” ilə oyuna daha yaxşı hazırlaşması üçün Florensiya klubunun xahişini müsbət cavablamışqdı. Bu səbəbdən “Kalyari” ilə səfər matçı mayın 23-ə irəli çəkildi. Mövsümün sonuncu oyununun sardiniyalılar üçün turnir əhəmiyyəti qalmadığından ev sahibləri florensiyalıların təklifini qəbul etmişdilər. Əks halda adalılar çətin ki, bu varianta razılaşaydılar. Amma B seriyasına düşməmək uğrunda yarışan əsas rəqiblərindən ikisinin – “Frozinone” və “Udineze”nin sonuncu turda bir-birinə qarşı oynayacağı matçın istənilən nəticəsi kalyarililəri avtomatik olaraq yüksək liqada saxlayacaqdı. “Fiorentina” isə hər ehtimala qarşı mövsümü mümkün qədər yüksək – 7-ci yerdə başa vurmaq üçün qələbə qazanmalı idi.

Vinçentso İtalyanonun komandası çətinliklə də olsa, hədəfini reallaşdırdı. Hesabı fasilə ərəfəsində “Fio” açsa da, meydan sahibləri ikinci hissədə matçda dönüş yarada bildilər. Lakin mübarizəyə 56-cı dəqiqədə qoşulan oyunçuların – Nikolas Qonsales ilə Arturun vurduğu qollar qonaqların 3:2 hesablı qələbəsini təmin etdi. Xalını 57-yə çatdıran “Fiorentina” 8-ci yerdə qalsa da, “bənövşəyilər” üçün mövsüm hələ sona çatmayıb. Belə ki, İtalyanonun komandası iyunun 2-də 29-cu turdan təxirə salınan oyunda “Atalanta” ilə qarşılaşacaq. Həmin oyunda qələbə və “Latsio” mövsümü məğlubiyyətlə başa vurarsa, “Fiorentina” 7-ci yeri tutacaq. Ranyerinin “Kalyari”ni məğlub tərk etdiyini də bildirək. 72 yaşlı mütəxəssis karyerasını başa vurmaq qərarına gəlib. Sardiniya klubuna 2023-cü ilin yanvarında təyinat almışdı. Adalıları A seriyasına çıxaran və bu liqada saxlamağı bacaran Ranyerinin istənilən halda “Kalyari” üçün faydalı işlər gördüyünü əminliklə söyləmək olar.

38-ci turun irəli çəkilən oyunu
Kalyari – Fiorentina 2:3
Deyola, 64. Mutandva, 85 - Bonaventura, 39. N.Qonsales, 89. Artur, 90+13-p.
Fiorentina: P.Terraçano, Biraqi, Ranyeri, Milenkoviç (Lukas Martines, 66), Dodo, Mandraqora (Artur, 56), Bonaventura (Beltran, 74), Kastrovilli, Barak, İkone (N.Qonsales, 56), Belotti (Nzola, 74).

1. İnter – 93 (37)… 8. Fiorentina – 57 (37)… 15. Kalyari – 36 (38)…
Bombardir: Lautaro Martines (İnter) – 24.