Tanınmış italiyalı mütəxəssis Klaudio Ranyeri futbolla birdəfəlik vidalaşmaq qərarına gəlib.

Bu məlumatı Ranyerinin hazırda çalışdırdığı ''Kalyari'' paylaşıb. Klubun rəsmi səhifəsində paylaşılan videoda təcrübəli çalışdırıcının mövsümün sonunda məşqçiliklə vidalaşacağı qeyd olunub. Ranyeri bu klubda ötən ilin əvvəllərindən işləyir. ''Kalyari'' hazırda sona 1 tur qalmış A seriyasında 15-ci pillədə qərarlaşıb. 72 yaşlı Ranyeri məşqçiliyə hələ 1986-da start verib. İndiyə qədər o, ''Kalyari''dən başqa ''Napoli'', ''Fiorentina'', ''Valensiya'', ''Atletiko'', ''Çelsi'', ''Yuventus'', ''Roma'', ''İnter'', ''Monako'', ''Lester'', ''Nant'', ''Fulhem'', ''Sampdoriya'', eləcə də Yunanıstan yığmasını çalışdırıb. ''Fiorentina'' ilə 1996-da həm ölkə kubokunu həm də ölkə superkubokunu, 2004-də isə ''Valensiya'' ilə Avropa superkubokunu qazanmış Ranyeri həm də tarixin ən sürpriz çempionluqlarından birinin memarıdı. Söhbət ''Lester''in 2016-da qazandığı premyer-liqa çempionluğundan gedir. Həmin vaxt cəmi 1 il öncə elitaya yüksələn ''tülkülər'' bütün Avropanı mat-məəttəl qoymuşdular.

ƏLİ