''Fənərbaxça''nın ulduzu karyerasını bitirdi
''Fənərbaxça''nın italiyalı ulduzu Leonardo Bonuççi futbolla vidalaşmaq qərarına gəlib.
“Football-plus.az” xəbər verir ki, təcrübəli italiyalı müdafiəçi mövsümün sonunda karyerasını başa vuracaq. Bu xəbər dünən İstanbul nəhənginin rəsmi saytında paylaşıldı. Dünənki məşqdən öncə o, bütün komanda ilə xatirə şəkili çəkdirdi. Eyni zamanda Bonuççiyə baş məşqçi İsmayıl Kartal və bütün futbolçuların imzalarının yer aldığı forma hədiyyə edildi. Ünlü futbolçu bunları dedi:
''Bu gözəl ailənin bir parçası olmaq çox zövqlü idi. Həm meydanda, həm də ondan kənarda əlimdən gələni etdim. Son bir savaşımız qalıb. Karyeramı titulla bitirmək istəyirəm və bunun üçün əlimizdə fürsət var. Hər kəsə təşəkkür edirəm''.
Komandanın adından isə Mərt Hakan Yandaş açıqlama verərək Bonuççiyə təşəkkür etdi. Qeyd edək, öz dönəminin ən güclü müdafiəçilərindən sayılan 37 yaşlı Bonuççi daha çox ''Yuventus''dakı çıxışı ilə populyarlıq qazanıb. Turin nəhəngində o, ümumilikdə 12 il keçirərək 8 çempionluq olmaqla 17 titul qazanıb. Bundan başqa Bonuççi İtaliya yığması ilə AÇ-2020-nin qalibi olub və hətta o turnirin finalında qol da vurub. Yığmanın heyətində ümumilikdə 121 oyun keçirərək 8 qol, 7 məhsuldar ötürmə ilə fərqlənib. Məşhur futbolçu cari mövsümə ''Union''da başlamışdı. ''Fənərbaxça''nın şərəfini isə o, yanvardan etibarən qorumağa başlayıb. Bonuççi ''sarı-lacivərdlilər''də 12 rəsmi oyuna çıxaraq aktivinə 1 məhsuldar ötürmə yazıb.
ƏLİ
Digər xəbərlər
