Türkiyə çempionatında əzəli rəqibi “Qalatasaray”la amansız çempionluq mübarizəsi aparan “Fənərbaxça” müdafiə xəttini ünlü bir isimlə gücləndirməyə hazırlaşır.

Son günlərdə İstanbul nəhənginin Leonardo Bonuççini transfer etməyə yaxın olması barədə yayılan xəbərlər dünən rəsmi təsdiqini tapdı. Məşhur italiyalı müdafiəçi danışıqların son mərhələsini yoluna qoymaq və tibbi müayinədən keçmək üçün dünən İstanbula gəldi. Heç bir problem yaranmasa, 36 yaşlı futbolçuyla 1 ili şərti olmaqla 1,5 illik müqavilə imzalanacaq. Bonuççi ikinci dövrə üçün 1,3 milyon avro qazanacaq. Müqavilədə göstərilən şərtlər yerinə yetiriləcəyi təqdirdə yayda şərti 1 illik müqavilə qüvvəyə minəcək. Amma müqaviləni yeniləyib-yeniləməmək haqqı “Fənərbaxça”nın əlindədi. Bonuççi daha 1 il İstanbulda qalsa, gələn mövsüm üçün 2,5 milyon avro qazanacaq. Bu transferin baş tutmasında Edin Cekonun da rolu az olmayıb. Belə ki, onların hər ikisinin haqlarını “World Soccer Agency” adlı menecerlik şirkəti qoruyur. Danışıqlar prosesində iştirak edən Ceko Bonuççini İstanbula gəlməyə razı salıb.

Qeyd edək ki, 1987-ci il təvəllüdlü Bonuççi İtaliya futbolunun XXI əsrdəki ən güclü müdafiəçilərindən sayılır. “Viterbese”nin yetirməsi olan və peşəkar karyerasına 2005-ci ildə bu klubda start verən Bonuççi gənc yaşlarında “İnter”ə yollansa da, burda özünü göstərə bilməmişdi. “Trevizo”, “Piza”, “Cenoa” və “Bari”də keçirdiyi dönəmlərdən sonra 2010-cu ildə “Yuventus”a transfer olunmaqla onun karyerasında yeni mərhələ başladı. Düzdü, arada bir mövsümlük (2017/18) “Milan” macərası oldu. Amma 2010-dan ötən ilin yayına qədər Bonuççi “qoca sinyora”ya sadiq qaldı. O, karyerası ərzində 8-i “Yuve”, 1-i “İnter”lə olmaqla 9 dəfə A seriyasının qalibi olub. İtaliya yığmasının heyətində AÇ-2020-ni də qazanıb. Yeri gəlmişkən, həmin turnirin finalında “Uembli”də İngiltərəyə qarşı oyunda İtaliyanı məğlubiyyətdən xilas edən qolu məhz Bonuççi vurmuşdu. Üstəlik oyunsonrası penalti seriyasında da onun zərbəsi dəqiq alınmışdı. O, “skuadra adzurra”nın şərəfini 121 oyunda qoruyaraq 8 qol vurub. Ötən yay Turin nəhəngindən bir qədər qalmaqallı şəkildə ayrılan təcrübəli müdafiəçi cari mövsümün ilk dövrəsini “Union”da keçirdi. Amma onun Berlindəki macərası o qədər də uğurlu alınmadı. Bonuççi “Union”da cəmi 10 rəsmi oyuna çıxaraq 1 qol vura bildi. Bundesliqa təmsilçisi ilə müqaviləsini qarşılıqlı razılıqla ləğv etdiyi və azad agentə çevrildiyi üçün “Fənərbaxça” bu keçidə görə heç bir məbləğ ödəməyəcək. Onu da bildirək ki, 2016-da İtaliyada ilin oyunçusu seçilən Bonuççi həmin il və növbəti il Xosep Qvardiolanın istəyi ilə “Mançester Siti”yə transfer oluna bilərdi. İngilislər 60 milyon avro ödəməyə hazır idilər və Bonuççi o dönəmdə dünyanın ən bahalı müdafiəçisinə çevriləcəkdi. Amma uşağının xəstəliyi üzündən İtaliyadan ayrılmaq istəməmişdi.