Yeni sponsor “Şəfa”nın önündə hansı hədəfi qoydu?
Bu həftə 2-ci liqada mövsüm başa çatacaq.
Bu liqanın autsayderlərindən biri də “Şəfa”dı. Ötən il fəaliyyətini bərpa edən klub yaxınlarda sponsoru ilə sağollaşdı. Maraqlı məqam odu ki, qış fasiləsindən sonra sonuncu pillədə olan paytaxt təmsilçisini “Pelikan” idman fəaliyyətləri klubu himayəsinə aldı. Amma tərəfdaşlq başa çatıb. Bu gözlənilməz ayrılıq bizlərdə təəccüb doğurduğundan, əsas səbəbi öyrənmək istədik.
Görəsən, “Pelikan” niyə kənara çəkildi? Həm məsələni dəqiqləşdimək, həm də gələcək planlarını öyrənmək üçün komandanın baş məşqçisi Elşad Məmmədovla əlaqə saxladıq. O, “Football-plus.az”a açıqlamasında artıq yeni sponsorla razılaşdıqlarını dedi:
“Qış fasiləsində “Şəfa”nın baş məşqçisi təyin olundum. Həmin vaxt komandanın 4 xalı vardı, sonuncu pilədəydik. Elə o ərəfələr klub rəhbərliyi “Pelikan” şirkətiylə müqavilə bağladı. Hər şey yaxşı idi. İkinci dövrənin iki turundan sonra klub prezidenti Cavid Nəzərov və Rəsul Allahverdiyev bu əməkdaşlığı sonlandırdılar. İndi isə komandanı ölkənin ən böyük holdinqlərindən biri “My Group” himayəsinə götürüb. Sevindirici haldı ki, futbola və futbolun inşafına sərmayə qoymaq istəyirlər. Hədəflər böyükdü. “Şəfa”nı köhnə əzəmətinə qaytarmaq məqsədləri var. Əsas hədəf premyer-liqaya qalxmaqdı. Bizə tapşırılan əsas iş sonuncu pillədən xilas olmaq idi ki, bunu bacardıq. İkinci hədəf isə liqada qalmaqdı”.
Baş məşqçi fürsətdən istifadə edərək sonuncu turdakı şanslarını da dəyərləndirdi:
“Bu həftə hər şeyə aydınlıq gələcək. Rəqibimiz çempionluğu təmin edən “Bakı Sportinq”di. Qalib gəlməyə çalışacağıq. Ən pis halda reqlamentə görə Region Liqasının ikincisiylə pley-off matçına çıxacağıq”.
RÖYANƏ OĞUZ
