MBA-da 1/4 final seriyaları davam edir.

“Finiks”in oyun qurucusu Kris Pol “Dallas”la oyundan sonra pley-offda üçxallıq atışların sayına görə 19-cu yerə yüksəldi. 37 yaşlı amerikalının hesabında 229 belə zərbə var. “Klippers”in forvardı Kavay Leonardı (228) arxada qoyan Pol 18-ci yerdə qərarlaşan Ceyson Kiddən yalnız 7 zərbə geri qalır. “Memfis”lə seriyanın 4-cü oyununda 4 üçxallıq atış reallaşdıran “Qolden Steyt”in oyun qurucusu Stefen Karri pley-offda belə atışların sayını 500-ə çatdırdı. 34 yaşlı amerikalı MBA tarixində bunu bacaran ilk basketbolçudu.

“Finiks”lə seriyanın 4-cü oyununda hesabına 26 xal, 7 ribaund və 11 ötürmə yazan “Dallas”ın oyun qurucusu Luka Donçiç pley-offun ilk 20 oyununda 650 xal, 150 ribaund və 150 ötürmə zirvəsini fəth etdi. O, MBA-da bunu bacaran ilk oyunçudu. Sloveniyalı 655 xal toplayıb ki, bu da pley-offda ilk 20 oyun üçün 3-cü nəticədi. Yalnız Maykl Cordan (718) və Uilt Çemberlen (705) daha yaxşı nəticə göstərib.

Bu arada 2021/22 mövsümünün ən yaxşı məşqçisinin və müntəzəm çempionatın ən dəyərli oyunçusunun adı açıqlanıb. Birinci nominasiyada “Finiks”in baş məşqçisi Monti Uilyams qalib gəlib. 50 yaşlı mütəxəssisin komandası müntəzəm çempionatı 64 qələbə və 18 məğlubiyyət ilə bitirib.

“Dallas”ın mərkəz oyunçusu Nikola Yokiç isə mövsümün MVP-si sayılıb. Ötən mövsümdə də eyni ada yiyələnən serbin ortalama göstəriciləri 27,1 xal, 13,8 ribaund və 7,9 ötürmə olub. Yokiç bu ad uğrunda mübarizədə “Filadelfiya 76”nın mərkəz oyunçusu Coel Embiidlə “Miluoki”nin forvardı Yannis Adetokumbnu qabaqlayıb.