Bu gün futbol üzrə ölkə çempionatının 1-ci liqasında 25-ci tura start veriləcək.

İki gün ərzində yayınlanacaq oyunlar PFL-in “1-ci liqa/2-ci liqa” “yutub” kanalında canlı yayınlanacaq.

Turun açılış matçında “İrəvan” “Difai Ağsu”nu sınağa çəkəcək. Xatırlayırsızsa, Qərbi Azərbaycan təmsilçisi ötən həftə iddialı MOİK-i məğlub edərək (3:1) futbol ictimaiyyətini təəccübləndirdi. İndi həmin qələbənin təsadüf olmadığını göstərmək zamanıdı. Nazim Süleymanovun, adətən, bir ehtiyat oyunçusu olan heyətlə bunu bacarıb-bacarmayacağı maraqlıdı. Hər halda, konkret autsayderlər sırasına enməmək üçün xal ehtiyatını yaxşılaşdırmaq vacibdi.

Qonaqlara gəlincə, Elgiz Kərəmlinin rəhbərliyi altında mübarizə aparan komanda liqanı tərk edəcəyi dəqiqləşən “Araz Saatlı”nı xeyli qabaqlayıb. Lakin bu, təhlükənin sovuşduğu mənasına gəlmir. Ona görə ki, mövsümü 9-cu pillədə bitirən kollektiv turnirdə qala bilmək üçün 2-ci liqanın gümüş medalçısıyla üz-üzə gəlməli və ev-səfər prinsipiylə reallaşacaq oyunlardan qalib ayrılmalıdı. Bilindiyi kimi, belə matçların gözlənilməz sonluqla bitməsi, yəni aşağı liqadakı rəqibin üstün tərəf olması istisna deyil. Belədə “Difai Ağsu” bugünün işini sabaha saxlamamaq üçün 8-ci pillədəki “Mingəçevir”i qabaqlamalıdı. Hər halda, bunun üçün real şanslar var!

8 may
İrəvan – Difai Ağsu
Bakı. “ASK Arena”. Saat 15.00.

Xal durumu: Qaradağ Lökbatan – 52, Şamaxı – 48, İmişli – 46, MOİK – 42, Karvan – 38, Zaqatala, İrəvan – 26, Mingəçevir – 25, Difai Ağsu – 20, Araz Saatlı – 10.

Bombardirlər: Elşad Tağıyev (Şamaxı) – 15, Elmir Rəhimzadə (MOİK) – 13.

KƏNAN BAHADIR