Sabah futbol üzrə ölkə çempionatının 1-ci liqasında 16-cı tura start verilir.

İki gün ərzində keçiriləcək oyunlar PFL-in “1-ci liqa/2-ci liqa” “yutub” kanalında canlı yayınlanacaq.

İlk matçda “İrəvan” MOİK-i qəbul edəcək. Bu oyunda nəticə Qərbi Azərbaycan təmsilçisi üçün çox vacibdi. Çünki uzun aradan sonra ötən həftə qazanılan qələbə (“Mingəçevir” - 1:0) düşərgədə yaxşı ab-hava yaradıb. İndi fürsətdən istifadə edib daha irəli getmək mümkündü. İş orasındadı ki, Nazim Süleymanovun komandasında futbolçu çatışmazlığı var. Üstəlik turlar geridə qaldıqca oyunçuların sayı azalır. Maraqlıdı, görəsən, meydan sahibləri ilk “11-liy”i qura biləcəkmi? Qonaqların durumu isə daha qənaətbəxşdi. Qəzənfər Abbasovun yetirmələri hələ ki iddiasını qoruyur. Lakin cüzi çatışmazlıqlar aradan qalxmasa, zamanla özünü nəticələrdə göstərə bilər. Kollektiv bunu nəzərə alıb səfərdən qazanclı qayıtsa, çempionluq uğrunda mübarizədən qopmayacaq. Əks halda həm də ən yaxın izləyicisi olan rəqibinin şanslarını artırmış olacaq.

İkinci oyunda “Şamaxı” ilə “Zaqatala” üz-üzə gələcək. “Şirlər” 15-ci turda “Difai Ağsu”nu məğlub edə bilmədi (0:0). Sürpriz nəticə həm lideri büdrətdi, həm də çempionluğa iştahlı komandalara ümid verdi. Ramiz Məmmədovun kollektivi indi qalib gəlməsə, “başı üzərini qara buludlar alacaq”. Axı düz üç komanda eyni xalla birinci pilləni bölüşür. Hər halda, “Şamaxı” son 6 turda məğlub olmayıb. Uğurlu seriyanı davam etdirmək də hədəflərdən biridi. Yəqin ki, oyunun evdə keçirilməsi, rəqibin ortabablardan “Zaqatala” olması komandanı arxayınlaşdırmaz. Nəzərə alınmalıdı ki, qonaqlar bəzi hallarda sürpriz etməyi sevir.

28 fevral
İrəvan – MOİK 0:7
Elvin Valiiev, 22., 90+3. Sabir Allahquliyev, 27-p.; 63. Elmir Rəhimzadə, 66, 77, 90+2.
Bakı, “ASK Arena”. Saat 13.00.

Şamaxı – Zaqatala 1:1
Səbayıl Bağırov. 13. - Nicat Oruclu, 90+4.
Şamaxı, şəhər stadionu. Saat 15.00.

Xal durumu: Şamaxı - 30, Qaradağ Lökbatan, İmişli, MOİK – 29, Karvan – 27, İrəvan – 23, Zaqatala – 19, Mingəçevir – 14, Difai Ağsu – 8, Araz Saatlı – 4.
Bombardirlər: Elşad Tağıyev (Şamaxı) – 11, Emin Zamanov (Şamaxı) – 8.

KƏNAN BAHADIR