Misli premyer-liqasında mövsümü sonuncu pillədə bitirəcək klubun adı bəllidi – “Qəbələ”!

32-ci turda “Kəpəz”ə uduzan (0:1) komanda çempionatı tərk edəcək. “Qırmızı-qaralar” nə Elmar Baxşıyevin, nə də Kaxaber Sxadadzedinin başçılığı altında məqsədə çatdı. Sözsüz, “Qəbələ”ni təmsil edən hər kəs günahkardı. Bu məsuliyyətdən kimsə boyun qaçıra bilməz...

Bundan sonra nələrin baş verəcəyini bilmirik. Deyirlər ki, premyer-liqada komanda sayı artırılacaq. Və ya “Qəbələ” 1-ci liqada “futbol ili”ni 3-cü pillədə bitirəcək komanda ilə pley-off matçı oynayacaq. Qalibin “hədiyyəsi” isə premyer-liqadı. İddia hələ təsdiqini tapmasa da, “Qəbələ”nin belə “jest”ə layiq olmadığına şübhə yoxdu. Səbəblər? N qədər...
Ötən mövsüm elitanı tərk edən “Şamaxı” sonuncu tura qədər intriqanı qoruya bilmişdi. Yerli futbolçularla və rəqibləriylə müqayisədə nisbətən təcrübəsiz baş məşqçi Vüqar Əsgərovla... “Qəbələ” isə sona cəmi 4 tur qalana qədər dözdü. Amma necə? Xallar qazanaraq? Xeyr. “Qırmızı-qaralar” “Kəpəz”in büdrədiyi oyunlar üzündən “nəfəs almağa davam edirdi”. Komanda cari mövsümdə kubokun yarımfinalına qədər irəliləməyi nəzərə almasaq, hansısa uğurla yadda qalmadı. Bütün cəhdlər fayda vermədi.

İndi “Qəbələ” yoluna qeyd-şərtsiz 1-ci liqada davam etməlidi. İdman prinsiplərini pozmaq, ilk növbədə “Kəpəz”lə “Şamaxı”nın haqqını yemək olmaz! Başqa klublar da öz yerində. Ümid edək ki, AFFA-nın yeni rəhbərliyi fəaliyyətinin ilkin dövrünə ədalətsiz addımla ləkə yaxmayacaq!
“Elit macəra”nın fasiləyə ehtiyacı var. Bir, yoxsa bir neçə il? Buna klub özü qərar verəcək... Görüşənədək, “Qəbələ”!

KƏNAN BAHADIR